ARON masayran ang mga panginahanglanon sa nagkalain-laing probinsya sa rehiyon nga gilangkuban sa South Cotabato, Cotabato, Sultan Kudarat, Sarangani ug General Santos (Soccsksargen), si Presidential Assistant for Eastern Mindanao Leo Tereso Magno nakigtagbo sa nagkalain-laing opisyal sa Central Mindanao niadtong Biyernes, Agosto 25.
Gawas sa pagka Office of the Presidential Assistant for Eastern Mindanao (Opamine) head, si Magno sakop usab sa Regional Development Council sa maong rehiyon.
Sa iyang pakigtagbo kang General Santos City Mayor Lorelie Geronimo Pacquiao, gipasabot sa mayor ang iyang tinguha nga maapil sa 4Ph project sa nasudnong kagamhanan aron matubag ang problema sa pabalay sa dakbayan.
Matud ni Sec. Magno nga andam siyang moabag sa siyudad basta ang kagamhanang lokal maoy mohatag sa listahan sa mga benepisyaryo ug ang nahimutangan sa katukoran sa housing project.
Si Magno misaad nga dad-on ang mga concerns sa siyudad ngadto sa Office of the President pinaagi sa Office of the Special Assistant to the President.
Ang 4Ph maoy usa sa mga prayoridad nga proyekto sa administrasyong Marcos nga nagtumong sa pagtukod og 6 milyones ka housing units sa nasod sulod sa 6 ka tuig.
Nakigkita usab si Magno sa nagkalain-laing opisyal sa kapulisan ug militar sa rehiyon aron hisgutan ang sitwasyon sa seguridad sa Central Mindanao.
Mitambong usab siya sa usa ka kalihokan uban sa Department of Environment and Natural Resources (DENR). (JPC/OPAMINE)