Kapin sa 300 ka mga residente daplin sa dagkong mga suba, sapa ug estero sa dakbayan sa Sugbo gikuha alang sa pagpatuman sa programa ug mga proyekto sa pagsulbad sa daling pag-awas sa tubig o pagbaha matag bunok sa uwan.
Ang Department of Social Welfare and Development (DSWD 7) nipatawag sa 376 ka mga indibiduwal nga benepisyaryo sa Risk Resiliency Program (RRP) atol sa workshop nga gipahigayon sa Agusto 24-25, 2023.
Mahimong kabahin sila sa programa nga “Gubat sa Baha: Limpyo ug Bantay sa Sapa” diin limpyuhan ug ibalik sa normal nga kondisyon ang mga suba sa Guadalupe, Kinalumsan, Mahiga, Butuanon, Lahug, ug Estero de Parian.
Kini ang labing taas nga napulo ka adlaw nga pagtrabaho maglakip sa dredging, paglimpyo, ug pag-instalar sa lainlaing mga lakang sa pagpaminus sa baha sa mga sapa ug agianan sa tubig sa Siyudad.
Ang mga benepisyaryo bayran sa inadlaw nga minimum nga sweldo nga P435.
Kini nga mga benepisyaryo giila usab nga mga kabos sa Listahanan, nga gi-verify usab sa Cebu City Department of Social Welfare and Services ug nagpuyo duol sa sapa o sa mga lugar nga delikado sa mga kalamidad.
Una niini, ang DSWD 7 ug Cebu City Government nagtambayayong sa samang programa alang sa Tagunol Creek ug Bulacao River nga adunay 128 ka mga benepisyaryo.
Ang RRP usa ka programa sa DSWD, nga naglihok sa Climate Change Adaptation, Mitigation, and Disaster Risk Reduction (CCAM-DRR) Cabinet Cluster, nga adunay duha ka modalidad, nga mao ang cash-for-work ug cash-for-training.
Naghatag kini og temporaryo nga mga opurtunidad sa kita bugti sa trabaho sa komunidad o pagtukod sa ilang mga kapasidad alang sa pagpaminus sa epekto sa katalagman ug pagdumala sa panginabuhian ug pagbansay sa kahanas. / EHP