NAPUHAG sa Philippine Drug Enforcement Agency (PDEA) Davao ang usa ka salag sa ilegal nga druga sa Davao City, alas 11:05 sa gabii niadtong Martes, Agosto 29, 2023, sa Purok Anahaw, Barangay Buhangin Proper, siyudad sa Davao.
Tulo ka mga gituohang drug pusher nadakpan, kinsa usa kanila, maoy nag-maintain sa drug den.
Human nga nadawat sa PDEA-Davao ang impormasyon ila dayon kining gipailawom sa surveillance ug gihimo dayon ang buy-bust operation, kauban ang National Bureau of Investigation (NBI) Davao ug ang Ecoland Police Station 15.
Giila sa PDEA-Davao ang target sa buy-bust operation nga si alyas Loreto, 40-anyos, drug den maintainer ug residente sa maong lugar.
Ang suspek napalitan og usa ka pakite sa gituohang shabu nga dunay gibug-aton nga 1 gramo ug mokantidad og P6,000.
Naaktuhan sab sa awtoridad ang duha ka mga indibiduwal nga sila alyas Michael ug alyas Jay nga nag-shabu session sulod sa drug den hinungdang apil sila sa giaresto.
Nakumpiska sab sa awtoridad ang laing tulo pa ka mga pakite sa gituohang shabu nga motimbang sa 12 gramos ug kantidad og P81,600.
Mga dinakpan pasakaan og kasong pagsupak sa Republic Act 9165 kun Comprehensive Dangerous Drugs Act of 2002.