Duha ka mga tawo ang gikataho nga nangamatay tungod sa epekto sa southwest monsoon nga gipakusog sa bagyong Goring ug Hannah, matod sa National Disaster Risk Reduction and Management Council (NDRRMC) sa Dominggo, Septiyembre 3, 2023.
Sa usa ka situational report, ang NDRRMC nagkanayon nga ang mga nangamatay gikan sa Western Visayas ug Cordillera Administrative Region (CAR).
Matod pa nga usa ka tawo ang gikataho nga missing samtang laing usa ang naangol.
Ang disaster bureau nagkanayon nga mokabat sa 114,724 ka mga pamilya o 418,192 ka mga indibidwal ang apektado sa duha ka weather disturbances sa 1,496 ka mga barangay sa rehiyon sa Ilocos, Cagayan, Central Luzon, Calabarzon, Mimaropa, Western Visayas, Cordilleras, ug National Capital Region (NCR).
Ang kagamhanan, pinaagi sa local government units, nakahatag na og kinatibuk-ang P20,901,428.11 nga kantidad sa hinabang ngadto sa mga apektadong indibidwal.
Matod pa nga adunay kinatibuk-ang 96 ka mga balay sa Ilocos region, Cagayan, Calabarzon, Mimaropa, Western Visayas, ug Cordilleras ang totally damaged tungod sa mga bagyo.
Kapin sa P130.2 milyunes ang danyos sa imprastraktura samtang kapin sa P421 milyunes sa sektor sa agrikultura.
Ang NDRRMC nagkanayon nga 25 ka mga dalan ug siyam ka mga taytayan ang dili maagian karon tungod sa kadaot, pagbaha o pagkahulog sa mga debris.
Gipailawom sa state of calamity ang Pototan sa Iloilo ug Sibalom sa Antique tungod sa pagkuso-kuso sa mga bagyo.
Migawas na sa Philippine Area of Responsibility (PAR) ang Bagyong Goring niadtong Miyerkules. / TPM sa SunStar Philippines