Aron maminusan ang kadaot ug mapanalipdan ang kinaiyahan, ang Kagamhanan sa Dakbayan sa Danao nipalabang og ordinansa nga nagpasiugda sa pagpalambo ug pagpanalipod sa tanang natural ug hinimo sa tawo nga wetlands o mga lamak.
Ang Ordinance 2023-17-018, o ang Danao City Wetland Protection Ordinance of 2023, gisagop nga balaod ni Mayor Thomas Mark “Mix” Durano niadtong Hunyo 1, 2023.
Gitinguha niini nga mapanalipdan ang mga lamak sa siyudad lakip na ang hinimo sa tawo nga adunay dakong epekto sa puy-anan sa wildlife.
“Before we make major decisions, we always consider its effects and the good of both people and environment. Times are changing and climate change is a serious threat. We continue to make legislations, through the Sangguniang Panlungsod members, that will protect Danao City,” matod ni Mayor Durano sa SunStar Cebu sa Sabado, Sept. 2.
Giila sa ordinansa ang papel sa mga basakan sama sa sapa, tubod, lim-aw, lanaw, bakhawan, kadagatan ug uban pang puy-anan sa lainlaing matang sa mga mananap kay kini nagbalanse sa ecosystem ug mahimo usab nga tinubdan sa pagkaon.
Gipangamahanan ni City Councilor Don Roel Arias, ang polisiya naglangkob sa konserbasyon ug maalamong paggamit sa kalamakan alang sa malungtarong kalamboan, inclusive growth, poverty reduction, food security, biodiversity conservation, climate change adaptation and mitigation, ug disaster risk reduction and management.
Ang Kagamhanan sa Siyudad ug ang tanan nga mga opisina ug departamento niini kinahanglan usab nga maghiusa sa iyang mga plano sa pagpalambo sa kasyudaran nga adunay kalabutan sa tanan nga mga lakang sa pagkonserba sa ordinansa, lakip ang pag-isyu sa mga permiso ug mga dokumento nga kinahanglan dili mosupak sa probisyon sa palisiya.
Ang ordinansa nagmando usab sa apektadong mga barangay nga i-integrate ug i-mainstream ang tanan nilang polisiya sa pagkonserba sa wetlands, sa konsultasyon sa City Environment and Natural Resources Office (Cenro), Department of the Interior and Local Government (DILG), ug uban pang hingtungdan nga ahensya.
Gitahasan usab sa City Government ang Cenro nga maoy mangunay nga ahensya sa pagmonitor sa pagtuman sa ordinansa.
Gi-reclassify usab sa ordinansa ang tanang wetlands sa public domain ngadto sa wetlands nga dili ipagawas isip agricultural lands ug kini protektahan ubos sa National Integrated Protected Areas System Act, Wildlife Resources Conservation and Protection Act, ug sa Revised Fisheries Code.
Gidili usab niini ang pagpahubas, pagkalot ug pag-reclaim sa kalamakan, gawas kon gikinahanglan alang sa kinatibuk-ang kaayuhan, nasudnong interes ug seguridad.
Kinahanglan usab nga adunay higpit nga pagpatuman sa mga easement zones, danger zones, ug pag-undang sa paggamit sa yuta sa mga basakan.
Ubos sa ordinansa, ang City Government kinahanglang maghimo sa Danao City Wetland Conservation Committee (DCWCC) nga maoy tahasan sa paghimo sa oversight function sa pagsiguro sa pagsagop sa Local Wetland Protection Policy.
Ang mayor ug bise mayor maoy mangulo isip chairperson ug co-chairperson uban sa mga representante gikan sa mga hingtungdang ahensya sa gobiyerno ug sectoral groups.
Ang DCWCC kinahanglang moporma ug morekomendar sa mga polisiya aron sa pagpalambo ug pagpanalipod sa kalamakan, pagkoordinar sa tanang paningkamot ug pagdumala sa pagpatuman niini. Gitahasan ang paghimo og tinuig nga taho sa kahimtang sa mga basakan sa siyudad ug ang pagpalambo sa lokal nga polisiya sa pagpanalipod sa kalamakan matag Hunyo sa tuig.
Ang bisan unsang paglapas sa bisan unsang probisyon sa ordinansa moresulta sa mosunod nga mga silot:
* First Offense — P2,000 nga multa ug verbal warning;
* Ikaduhang Paglapas —P3,000 nga multa ug sinulat nga pahimangno o pagbadlong; ug
* Third Offense — P5,000 nga multa ug/o pagkapriso nga dili moubos sa unom ka bulan sa pagbuot sa korte.
Ang DCWCC gitahasan usab sa paghimo sa implementing rules and regulations nga ipatuman niini tulo ka bulan gikan sa pag-aprobar sa ordinansa. / EHP
