Gipahimangnuan ni kanhi world champion British Amir Khan si American Terence Crawford nga likayan ang sayop niyang desisyon nga nahimo kaniadto.
Niadtong 2016, nisaka og timbang si Khan aron makontra si Mexican superstar Saul “Canelo” Alvarez sa catchweight nga 155-pounds.
Niadtong higayuna, si Khan nagkampanya sa welterweight division (147) samtang si Alvarez naa sa middleweight (160).
Ang resulta, brutal nga 6th round knockout nga kapildihan ang nahiaguman ni Khan.
Sa kasamtangan, adunay negusasyon kabahin sa pagsaka ni Crawford hangtod na sa super middleweight (168) aron suwayan pag-ilog ang undisputed title ni Alvarez ning maong timbang.
Kon buot hunahunaon, pamilyar na si Khan sa kapasidad sa duha ka mga boksidor gumikan kay iyaha sab nakontra si Crawford niadtong 2019 diin nasugamak sab siya sa 6th round TKO nga kapildihan.
Niini, makumpara ni Khan ang tagsatagsa ka abilidad nila ni Crawford ug Alvarez.
Sa pagtuo ni Khan, delikado si Crawford kon madayon ang ilang away ni Alvarez.
“There were rumors that I was hearing that Crawford may go up to fight Canelo as well. I’m like..... I like both guys and I think Crawford should not really give that much weight away,” matod ni Khan nga napatik sa www.boxingscene.com.
Gipasabot ni Khan nga grabe ra ka taas ang sakaon nga timbang ni Crawford, kinsa kasamtangang undisputed champion sa welterweight division.
“It’s too much. I’ve tried it myself, I’ve done it myself at the peak of my career. I had a great win against [Chris Algieri] and then went and fought Canelo,” dugang ni Khan. (ESL)