Ang Nasudnong Kagamhanan, pinaagi sa Department of Social Welfare and Development (DSWD), moapod-apod og cash aid sa gagmay nga rice retailers nga maapektuhan sa mandatory price ceiling sa bugas.
Sa usa ka interbyo sa radyo, si DSWD Secretary Rex Gatchalian niingon nga ang mga retailer mahimong makadawat og hangtod sa P15,000 isip hinabang taliwala sa gipatuman nga price cap sa bugas.
Matod niya nga itugyan kini sa mga retailer nga maapil sa listahan nga himuon sa Department of Trade and Industry (DTI) ug Department of Agriculture.
Si Gatchalian niingon nga ang DSWD adunay dali nga magamit nga pundo ubos sa Sustainable Livelihood Program niini.
“Kasi sa utos ng ating Pangulo, ‘yung gagamitin nating behikulo na programa dito, ‘yung tinatawag na Sustainable Livelihood Program,” matod niya.
“Nakahanda na ‘yung troops nga namin. We are ready for payout anytime,” matod niya.
Si Marcos nipagawas sa miaging semana og executive order nga nagtakda sa mandatory price ceiling nga P41 matag kilo sa regular milled rice ug P45 matag kilo sa well-milled rice.
Ang mando miepekto sa Martes, Septiyembre 5.
Ubay-ubay nga mga tigbaligya og bugas mipili sa pagsira sa ilang mga tindahan taliwala sa kahadlok nga maalkanse tungod sa pagsaka sa presyo.
Sa usa ka interbyo sa telebisyon, ang presidente sa Grains Retailers Confederation of the Philippines Inc. Eastern Visayas nga si Frederic Dy niingon nga ang mga retailer sa lokal nga bugas humay mahimong mawad-an og P40,000 kada semana tungod sa giluwatan nga mando ni Marcos taliwala sa pagsaka sa presyo sa bugas, usa sa mga staple nga pagkaon sa mga Pilipino.
Matod niya nga ang presyo sa bugas humay sa kamerkaduhan nagdepende kon pila ang ilang palit gikan sa mga magpapatigayon.
Apan tungod sa taas nga presyo, mapugos sila sa pagbaligya sa ilang mga produkto sa presyo nga dili makatabon sa ilang nagasto tungod sa price cap.
Si Presidente Ferdinand Marcos Jr., kinsa mao usab ang concurrent secretary sa DA, niingon nga temporaryo lang ang price ceiling. (TPM sa SunStar Philippines)