Mamawi ang Dakbayan sa Carcar sa sunod nga Pasigarbo sa Sugbo aron malangkat pag-usab ang hingpit nga kadaugan.
Kini ang reaksiyon ni Carcar City Mayor Patrick Barcenas tungod sa pipila ka mga kausaban sa resulta sa mananaug sa kompetisyon nga gibutyag sa usa ka tigom sa mga mayor sa Kapitolyo sa Miyerkules, Septiyembre 6, 2023.
Matod ni Barcenas nga sakit apan iyang dawaton ang bag-ong resulta sa mga ningdaug sa Pasigarbo sa Sugbo 2023.
Ang Carcar nagrepresentar sa ilang kapistahan, Kabkaban Festival, nga una nang nidaug sa milabay’ng Pasigarbo.
Apan tungod sa wala damhang kontrobersiya sa kalihukan, nihimo og desisyon ang gobernador sa probinsya nga ipaubos sa re-computation ang tanang mga puntos sa 50 ka mga contingent lakip na ang festival queens gumikan kay wala na magkadimao ang pagboto sa online platforms.
“Sakit man para sa katawhan sa Carcar pero ako makaingon, duna nay kasabutan ang tanan and para lang sa panaghiusa, balido sad ang mga rason,” matod ni Barcenas.
Ang Dakbayan sa Carcar milandig sa ika-unom nga pwesto gikan sa pagka grand champion niini sa unang anunsyo sa mga mananaug sa Agusto 28, 2023 sa Carcar City Sports Center.
“Sa akong bahin, nahimo naman mi nga 6th (placer), willing lang sad ko mo accept kay mao man sad ang ila naa man sad silay paagi sa pag judge mao to nga okay na lang. Ato na lang nang dawaton ang tanan, sa sunod,” dugang ni Barcenas.
Bisan pa niini, gipasidunggan gihapon ni Barcenas ang tanang mga lokalidad nga nidaug sa kompetisyon.
Giawhag usab niini ang mga konstituwente nga dawaton ang resulta alang sa kalinaw ug kahapsay sa matag Sugboanon.
“Ato lang ibutang sa atoang tagsa-tagsa nga kasingkasing nga to go by peace,” matod ni Barcenas.
“Kahibawo ko nga we are all winners. Winners gihapon ta,” dugang niya.
Ang festival queen sa Siyudad nga si Jhesidy Thea Alberca nga unang gideklarar nga mananaug mao na ang gideklarar nga 2nd runner-up base sa bag-ong resulta.
Hinuon, nalangkat gihapon sa Kabkaban Festival ang korona alang sa Street Dancing competition.
PAGHUKOM
Nasurpresa ang tanan atol sa presentasyon sa mga mananaog kay gipaubos sa pagboto ang paagi sa pag-ihap sa scores sa tanang contingents.
Nipabor ang mayoriya sa ika-duhang approach nga magbase sa ranking sa matag total raw score sa judges.
“The final outcome of the Pasigarbo 2023 in the different categories will be in your hands. Inyo, inyo na decision busa tungod kamoy nagdesider, dili na tingali magpadayon ang kyawkyaw nga duna nana silay gipaboran og unsa man ang decision, mamirma man ni sila commitment to accept the decision,” matod ni Gobernador Gwendolyn Garcia sa Septiyembre 6, 2023.
Nadesisyunan sa gobernador nga ipaubos sa recounting ang scores sa 50 ka mga contingent tungod sa technical glitches ug sa wala na masubay nga online voting.
Subay niini, nagpasalamat gihapon ang gobernador sa paghugpong ug panaghiusa sa mga lokalidad sa maong higayon.
Tungod niini, gipahibawo ni Garcia nga walay rason nga dili ipadayon ang Pasigarbo sa Sugbo sa sunod tuig.
Ang pormal ug opisyal nga awarding ceremony, lakip na ang repeat performance sa mga mananaog sa Pasigarbo sa Sugbo 2023, ipahigayon sa International Convention Center (IEC) sa dakbayan sa Sugbo sa Oktubre 7, 2023.