Ibalik ni Cebu Governor Gwendolyn Garcia ang Obra Negosyo Eskwela program sa probinsya sa Sugbo aron maabagan ang gagmay’ng mga magpapatigayon.
Kini maoy gipahibawo ni Garcia sa Septiyembre 8, 2023 atol sa hamubo nga programa sa pagbukas sa Sugbo Negosyo Expo sulod sa usa ka mall sa Sugbo.
Una na kining gisugdan ni Garcia sa 2011 diin magtinabangay ang mga tinun-an ug ang mga magpapatigayon sa pagpalambo sa ilang negosyo sa lungsod.
“I think it was on my second or third term kada lungsod I encouraged the mayors to come up with small entrepreneurs also I called on universities kay I asked them if you are in your third year, mag internship man. I asked them to recommend graduating business administration students para purmahon ni sila as teams, mo immerse ni sila sa mga lungsod,” matod ni Garcia. Ang lokal nga kagamhanan gitahasan nga maoy moabag sa mga tinun-an sa transportasyon, kapuy-an, ug pagkaon inubanan sa tabang sa Cebu Provincial Government.
Samtang ang mga tinun-an maoy motabang ug motudlo sa gagmay nga mga magpapatigayon unsaon pagpalambo sa ilang negosyo.
“Basic bookkeeping, business plan, business proposal and to improve sa products. Ang mga estudyante mas maayo nga ma immerse sad in the school of life,” dugang ni Garcia.
Gawas niini, mahatagan usab og higayon ang mga tinun-an nga ma-expose sa real-life scenarios samtang nag-abag sila sa mapilian nila nga gagmay nga magpapatigayon.
Ipresentar unya nila ang business proposals sa namugna’ng produkto ngadto sa mga hurado ug didto na pilian ang mga mananaog.
Naundang ang maong programa human natapos ang unang tulo ka termino ni Garcia isip gobernador niadtong 2013.