Kapin sa usa ka kilo nga gituohang shabu nga dunay balor nga P8.840 milyunes nasakmit sa mga sakop sa Regional PNP Drug Enforcement Unit 7 sa ilang buy-bust sa usa ka regional high value individual (HVI) sa Sitio Campar, Barangay Poblacion Pardo, dakbayan sa Sugbo, sa alas 12:03 sa kaadlawon, Biyernes, Septiyembre 8, 2023.
Ang suspek giila nga si Manuel Ace Delgado Causing, alyas Teban, 21, taga Upper Galilee, Brgy. Duljo Fatima, dakbayan sa Sugbo.
Nakuha gikan kang Causing ang dagkong putos sa gituohang shabu nga motimbang og 1,300 gramos.
Ang ilegal nga drugas gisulod sa Chinese tea bag ug lain pa nga mga putos nga gisulod sa pink nga bag.
Matod ni Police Lieutenant Colonel Gerard Ace Pelare sa Police Regional Office (PRO 7) nga ang nakuha nga supply sa ilegal nga drugas dako og epekto sa negusyo sa ilegal nga drugas sa dapit ug kasikbit nga mga barangay.
Nabantayan sa kapulisan nga nagka batan-on na ang nagpayuhot sa ilegal nga drugas sa Central Visayas sanglit sila ang nipuli niadtong mga edaran na nga nangadakpan.
Sa kinatibok-an nga anti-illegal drug operation sa kapulisan sa Central Visayas moabot ngadto sa P9.3 milyunes nga balor sa drugas ang ilang nasakmit.