Gidid-an sa Korean Basketball League (KBL) ug Japan B.League ang ilang Pinoy nga international players nga makaduwa sa Gilas Pilipinas alang sa nagkaduol nga 19th Asian Games sa Hangzhuo, China.
Mao kini ang hinungdan nga wala pa’y klaro kon makaduwa ba si Rhenz Abando sa Gilas alang sa matag upat ka tuig nga mga kompetisyon nga sugdan karong Septiyembre 23, 2023.
Niini, nasayran nga nagpadala og suwat-hangyo ang Philippine Basketball Association (PBA) sa KBL aron tugtan si Abando nga moduwa sa Gilas.
Usa ka taho sa Korean basketball website Jumpball nibutyag nga dili una moduwa si Abando sa KBL champion Anyang JungkwanJang Red Boosters (kanhi Anyang KGC) sa Flora Preseason Cup sa Japan.
Si Abando, kinsa niduwa sa Gilas sa 2023 FIBA Basketball Word Cup, naa pa gihapon sa Pilipinas sa pamasin nga makaduwa kini sa national team alang sa Asian Games.
“This is because there is a possibility that it will be included in the final entry for the 2022 Hangzhou Asian Games, which will open on the 23rd,” taho sa Jumpball.
Giangkon sa usa ka opisyal sa Anyang ang kabahin sa hangyo sa PBA.
“An official letter has arrived from the Philippine Basketball Association. Entry has not been confirmed yet. I understand that discussions are underway on whether to include players who play not only in Abando but also in Japan,” pamahayag sa opisyal sa Anyang nga napatik sa Jumpball.
Gikompirmar kini mismo ni PBA commissioner Willie Marcial, kinsa nitataw nga nagpadala sab sila og suwat-hangyo sa Japan B.League.
Ang bag-ong coach sa Gilas nga si Tim Cone nagkinahanglan pa og mga magduduwa nga sa iyang tan-aw magamit og insakto sa Gilas.
Ibutyag ang Gilas Final 12 nga moduwa sa Asian Games human sa praktis sa team karong Lunes, Septiyembre 11, 2023. / ESL