Mahilakip na unya sa giumol nga urban adventure package tour sa Kagamhanan sa Lalawigan sa Sugbo ang pagbisita ug pagpakita sa performance sa dancing inmates sa Cebu Provincial Detention and Rehabilitation Center (CPDRC).
Kini maoy usa sa gikonsiderar ni Cebu Gov. Gwendolyn Garcia diin mahilakip na unya sa tour packages ang Dakbayan sa Lapu-Lapu, Sugbo ug Mandaue ingon man ang lungsod sa Cordova.
Matod ni Garcia nga aduna nay sinemana nga performance ang CPDRC inmates apan madugangan kini ugaling adunay mo request sa ilahang buhatan.
Sa Septiyembre 8, nibalik pagpasundayag ang CPDRC dancing inmates isip pahinungod kang Birhen Maria nga nagsaulog sa adlaw nga natawhan.
Sa iyang bahin, si Reynaldo Valmoria, jail warden sa CPDRC, nidugang nga buhaton na usab nila ang lain performance sa sunod tuig sa susamang petsa.
Mga 300 ka inmates ning-perform sa 90s-themed dance alang sa mga bisita ug media nga mas minos ang gidaghanon kon itandi sa wa pa ang pandemic nga niabot og 700.
“It is because time to time manglaya sila, so kanang mga bago pud namong gi-remand among pud gi practice everyday” pagpasabot ni Valmoria kon nganong minos ra ang dancers sa pagkakaron.
Matod niya nga ang pagsayaw tipik sa rehabilitasyon sa mga inmate ug tipik usab sa decongestion effort sa pasilidad.
“Through this rehabilitation through dancing they also have a lot of things to do other than drugs” matod ni Valmoria.
Sa kasamtangan di mominus 900 ka mga inmates ang anaa sulod sa jail facility nga adunay kapasidad nga 1,650.
Si Marty Ybañez, Cebu Provincial Tourism Officer, niingon nga ilang gibuksan ang viewings mga walo ka buwan na ang nakalabay apan mga lima ka buwan lang ang milabay sukad kini gihimong regular diin ang mga guest makatan-aw.
“This is already a regular thing” sulti ni Ybañez sa SunStar Cebu niadtong Biyernes, Septiyembe 8, 2023.
Matod ni Ybañez nga ang mga bisita nga gustong motan-aw sa dancing inmates makapa register pinaagi sa Cebu Provincial Tourism Office ug kini way bayad.
Himuong sinemana ang performance kon ang magparehistro moabot og 45 ka buok. / ANV, KJF