Nat’l. govt. maoy tag-iya sa skywalk sa Osmena blvd.?

File photo
File photo

Ang Department of Public Works and Highways (DPWH) nibutyag kang Cebu City Councilor Jerry Guardo, committee on infrastructure head, nga ang pagpanag-iya sa duha ka skywalk sa may Osmeña Boulevard iya sa buhatan ni anhing Kongresista Raul Del Mar.

Si Congresswoman Rachel Marguerite “Cutie” Del Mar nikompirmar sa text message niadtong Sabado, Septiyembre 9, 2023, nga ang pundo alang sa skywalk duol sa Cebu Normal University gikan sa buhatan ni kanhi Deputy Speaker Raul Del Mar.

Matod niya, ang skywalk nga gipundohan sa buhatan ni kanhi senador Serge Osmeña naa nahimutang sa dalan P. del Rosario ug Sanciangco.

Sigon niya, karong panahona ang isyu sa pagpanag-iya wala magsalig sa pagluwas sa mga skywalk, apan direkta nga nagpunting sa demolisyon.

Gipangutana sa SunStar Cebu si Del Mar kon makaingon ba siya nga iyaha sa iyang buhatan ang pagpanag-iya sa skywalks, apan wala pa motubag ang kongresista sa pangutana.

Si Engineer Marilyn Ojeda, Cebu City District Engineering Office (CCDEO) planning division head, niingon sa pakighinabi sa telepono kang Guardo sa pikas linya niadtong Huwebes, Septiyembre 7, 2023, nga ang district engineering office maoy mipatuman sa pagtukod sa mga skywalk.

Matod ni Ojeda, walay dokumento ang CCDEO nga makapamatuod nga ila ang pagpanag-iya sa duha ka skywalk.

Siya niingon nga human sa pagpatuman sa proyekto mga tuig na ang milabay, ang pagpanag-iya gitugyan ngadto sa hustong proponent nga mao ang buhatan ni Del Mar.

Sigon ni Ojeda nga dili sila makaangkon og pagpanag-iya tungod kay wala kini nalista sa ilang mga kabtangan.

“Wala na sa among (list of) properties ang kanang mga skywalks. Wala na sa among Road Bridge Information (RBI) application, dili jud na namo makita didto,” Ojeda said.

Gidugang niya nga ang pagpanag-iya iya sa lokal nga gobyerno o sa proponent.

Apan, matod ni Guardo, dili usab makaangkon ang siyudad sa pagpanag-iya tungod kay wala usab silay mga dokumento nga makapamatuod, hinungdan nga dili sila makapadayon sa demolisyon.

Nagkanayon si Ojeda nga ang ilang gihuptan mao ra ang plano sa pagtukod sa duha ka skywalk, diin nangayo og kopya si Guardo aron mahibaw-an niya kinsa ang mga mipirma sa maong proyekto.

Gihatagan og gibug-aton ni Guardo nga ang pagpanag-iya dili mabalhin ngadto kang “Cutie” Del Mar, human sa kamatayon ni Raul Del Mar, sa konteksto nga ang pagpanag-iya gitugyan ngadto sa naulahi.

Kalabot sa pagpatangtang, gipangutana ni Guardo si Ojeda kon mahimo ba lang silang moisyu og certificate of no objection, apan ang naulahi miingon nga dili sila maka-isyu sa maong certificate.

“We cannot issue a certificate of no objection, kay unsa may among i-object nga dili mana amoa (ang skywalk),” pagpasabot ni Ojeda.

Siya niingon nga nisumiter sila og suwat ngadto sa Cebu Bus Rapid Transit (CBRT) management nga nagpamatuod nga ang CCDEO mao ang implementing entity sa mga skywalk, ug nagpahibalo nga dili sila maka-isyu og certificate of no objection.

Gikatakdang gub-on ang duha ka skywalk aron mahatagan og dugang luna ang padayong konstruksyon sa Phase 1 sa CBRT project.

CBRT

Si Engineer Nigel Paul Villarete, usa ka urban planner ug kanhi Cebu City Administrator, niingon sa interbyu sa news and commentary program sa SunStar Cebu nga “Beyond the Headlines” niadtong Huwebes, Sept. 7, 2023, nga ang CBRT project package 1, nga gikan sa Cebu South Bus Terminal (CSBT) paingon sa Kapitolyo sa Probinsiya, dili maayong lugar nga sugdan sa paghatag og solusyon sa pampublikong transportasyon.

Giklaro ni Villarete nga ang CBRT project wala gipatuman aron masulbad ang mga isyu sa trapiko, kondili aron matubag ang mga problema sa pampublikong transportasyon.

“Ang CBRT usa ka solusyon sa transportasyon sa publiko. Dili kini solusyon sa trapiko,” matod ni Villarete.

Dugang pa ni Villarete nga ang CBRT gituyo alang sa masa ug dili alang sa mga sakyanan, nipasabot nga 80 ngadto sa 90 porsyento sa publiko ang mosakay og pampublikong transportasyon.

Matod niya, ang pagtukod sa CBRT gihimo unta sa dapit diin daghan ang mosakay og pampublikong transportasyon.

“They should consider the origin of destination (OD), where the bulk of people come from and where the bulk of people go.

“When you plan for public transport, it should be from your residential areas to your wor­king areas,” matod pa Villarete. / AML

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph