Niawhag si Acting Cebu City Mayor Raymond Alvin Garcia sa kabatan-onan nga manginlabot sa issues ug concerns nga may labot ang lungsod, ilabi na kay nagsingabot ang Sangguniang Kabataan (SK) elections.
Kini gihimo atol sa wreath-laying nga gipahigayon sa Osmeña Marker niadtong Sabado, atol sa ika-145 nga kasumaran sa adlaw nga natawhan ni kanhi Presidente Sergio Osmeña, Sr.
Ang wreath-laying gitambungan sa mga opisyal sa Armed Forces of the Philippines Visayas Command ug sa kapulisan. Didto sab sila City Councilor Jaypee Labella ug mga representante sa pamilya Osmeña.
Wala makatambong si Mayor Michael Rama nga kasamtangang tua sa Vladivostok, Russia.
Matod sa Acting Mayor, si Sergio Osmeña Sr., gipanganak ug nagtubo samtang gubot ang panahon tungod sa rebelyon sa Pilipinas batok Espanya, dayon sa Estados Unidos, apan, bisan pa man niana, nakahuman kini pag- eskwela unya nahimo pang abogado.
Misulod siya sa pulitika ug nahimong konsehal, gobernador, ug magbabalaod sa Philippine Assembly, unya nahimong Presidente nga misugod sa pagpabarog pagbalik sa nasod human sa ikaduhang gubat sa kalibutan.
“Not bad for someone who sat as the country’s 4th president in what is supposedly his twilight and retirement years,” matud sa Acting Mayor.
Matud pa sa Acting Mayor, mahinungdanon nga sugiron gyud sa mga batan-on kon kinsa ang hustong lider nga angayang pilion.
Giawhag sab sa Acting Mayor ang tanang modagan nga kusganon nga moserbisyo kon mapili na. / PR