GIAWHAG karon ang Department of Justice (DOJ), National Bureau of Investigation (NBI), ug Philippine National Police (PNP) nga dalion ang imbestigasyon sa 15 ka wala masulbad nga kasong pagpatay sa mga lumad o Indigenous People (IPs) sa Davao City.
Kini maoy nahimong unod sa privilege speech ni Indigenous Peoples Mandatory Representative (IPMR) Rodolfo M. Mande, Martes sa buntag, Septyembre 12, 2023.
Gipadayag ni Mande ang iyang kabalaka bahin sa 15 ka wala masulbad nga kasong pagpatay nga nahitabo sa Davao. Pipila sa 15 ka mga kaso mao ang lider sa Obu-Manuvu, si kanhi Deputy Mayor Omelis Duyan, ug uban pa bag-ohay lang kon diin duha ka mga pulis ang gipusil ug gitigbas patay.
Gitin-aw ni Mande nga ang giingong armadong grupo ug ang giingong mga delikadong miyembro sa Indigenous Cultural Communities (ICCs) sa Marilog District nga naggamit sa mga lumad nga maghupot og tag-as nga kalibre nga armas ug peligrong mga gamit aron targeton ang mga lideres kinsa nagprotekta sa Ancestral Domains sa mga lumad.
"In accordance with the priority agenda of Peace and Order of the City Government of Davao, I am urging the Department of Justice (DOJ) through the National Bureau of Investigation (NBI), Philippine National Police, and other concerned Offices and Agencies to conduct a further investigation of these 15 unresolved murder cases of Indigenous People (IPs) in Davao City,” awhag ni Mande.
Iya na sab nga giawhag ang giingong mga armadong grupo nga mosurender ug did-an ang paggamit ug pagdala og sundang, baraw, o "bangkaw," kutsilyo o "ilab," armas, o bisan unsang makapatay nga mga gamit ug panalipdan ang kahapsay ug kalinaw sa ICCs sulod sa Ancestral Domains sa Davao City aron nga mapakgang ang kalihukang kriminal.
"We have been long clamoring for justice which should rightly be served. Our plea for help for the immediate resolution of the unresolved murders remains to be uncertain," pangayumo ni Mande.
Sa gihimong pinakalit nga paghinabi, gikanayon ni Mande ngadto sa SunStar Davao, nga pipila sa mga hinungdan sa maong pagpatay mao nga ang duha ka partido nagkomplikto bahin sa liderato ug luna. Iyang namatikdan nga mga tribu sa Matigsalug ug Obu Manuvu way maayong tinagdanay, ilabi na bahin sa Ancestral Domains sa Marilog.
Dugang pa niya nga nagpatunga na sila subay sa customary law apan tungod kay kining mga kasoha naglambigit sa pagpatay, nakahukom silang ila kining ipadangat ngadto sa kapulisan ug uban pang hingtungdang ahensiya aron imbestigahan tungod kay kasagaran sa konplikto sa tribo naglambigit lang sa paggamit og sundang ug kutsilyo apan ang pinakauwahing mga kasong pagpatay naggamit og tag-as nga kalibre nga armas.
Iyang giawhag ang mga awtoridad nga himuong prayoridad kini nga kaso.