Tungod sa grabeng localized thunderstorms o unos, dili sa tropical depression, maoy hinungdan sa pagbunok sa uwan nga nakamugna og halapad nga pagbaha sa halos tanang dapit sa Metro Cebu sa nangaging mga adlaw, labina sa dakbayan sa Mandaue nga nisuspenso sa klase sa mga tunghaan sa Miyerkules, Septiyembre 13, 2023.
Mao kini ang gibutyag ni Alfredo “Al” Quiblat, pangulo sa Philippine Atmospheric Geophysical and Astronomical Services Administration (Pagasa) Visayas, ngadto sa SunStar Cebu sa Martes, Septiyembre 12, 2023.
Gipadayag ni Quiblat nga ang pag-ulan sa miaging mga adlaw nahulog sa kategoriya nga “intense to torrential”, sama niadtong Lunes, Septiyembre 11, 2023.
“Last Monday, the weather was primarily due to localized thunderstorms, with the Habagat having minimal impact. The rain was indeed caused by thunderstorms,” matod niya.
MAGBINANTAYON
Giawhag ni Quiblat ang publiko nga magpabiling mabinantayon pinaagi sa kanunay nga pagsusi sa advisories sa Pagasa sa thunderstorm ug pagpabiling updated sa mga impormasyon nga ilang ihatag sa tibuok adlaw.
Iyang giklaro nga sa pag-isyu og weather advisories aron pagtagna bahin sa thunderstorm, paghatag og usa ngadto sa duha ka oras nga lead time, depende sa kapabilidad sa ilang radar.
GIBAHA
Sa laing bahin, giawhag sa mga negusyante ang mga kagamhanan sa dakbayan sa Sugbo ug Mandaue ug ang Department of Public Works and Highways (DPWH 7) nga magtinabangay sa pagsumpo sa baha.
Si Cebu Chamber of Commerce and Industry (CCCI) president Charles Kenneth Co nitug-an sa SunStar Cebu pinaagi sa text message niadtong Miyerkules, Septiyembre 13, 2023, nga ang bag-o nga mga insidente sa pagbaha nakapasakit ug nakapahasol sa kinatibuk-ang publiko.
“Despite the ongoing efforts to improve our waterways, the flooding problem persists, even in areas that have never been flooded before,” matod ni Co. / KJF, EHP