USA ka photo exhibit ang natigayon diin highlight niini mao ang mahinungdanong papel sa imprastraktura sa paglambo sa ekonomiya sa nasud.
Kini gihimo didto sa South Wing Lobby sa Batasang Pambansa Complex sa Quezon City adlaw’ng Martes, Septyembre 12, 2023, ug nahuman Miyerkules, Septyembre 13.
Gipangunahan kini sa Committee on Flagship Programs and Project ug sa Committee on Public Works and Highways uban sa partnership sa Department of Public Works and Highways (DPWH) ug sa Department of Transportation (DOTr).
Giulohan ang programa og Redefining The Country Infrastructure Program: A look Into the Build, Better, More Flagship Programs and Projects.
Ang usa sa mga gipasigarbong mamumulong mao si Davao Occidental Lone District Cong. Claude Bautista, kinsa chairperson sa nahisgutang komitiba.
Sumala ni Bautista nga ang nasampit nga photo exhibit nag-highlight sa usa ka mahinungdanon nga papel niini sa imprastraktura sa paglambo sa ekonomiya sa nasud nga dunay mga benepisyo nga gidala, ug ang mga lakang nga kinahanglan aron masiguro ang usa ka malungtaron ug lig-on nga ekonomiya.
Atol sa pamulong ni Bautista, naa sila DOTr Assistant Secretary Hector Villacorta, DICT Assistant Secretary Edwin Ligot samtang naa sab sila DPWH Usec. Emil K. Sadain, Cong. Vincent Franco Frasco ug si Cong. Romeo Momo Sr.