Gipadayag ni Filipino boxing icon Manny Pacquiao nga naghinamhinam siyang morepresentar sa Pilipinas alang sa 2024 Paris Olympics.
Atol sa paglusad sa bag-ong naporma nga Maharlika Pilipinas Volleyball Association (MPVA) ning Biyernes, Septiyembre 15, 2023, nagkanayon ang Pambansang Kamao ng Pilipinas nga dugay ra niyang pangandoy nga makarepresentar sa nasod alang sa international competitions.
“Waiting for that. Excited naman ako dyan,” matod ni Pacquiao nga napatik sa www.abs-cbnnews.com.
Si Pacquiao, kinsa umaabot nga hall of famer sa professional boxing, nagbalik-lantaw kabahin sa iyang pangandoy kaniadto nga makasulod sa Philippine team isip usa ka batan-ong boksidor sa General Santos City.
Apan pakyas siyang makasulod sa national team hinungdan nga naahat siyang mamasin sa professional ranks sa edad nga 16.
“From the beginning sabi ko, nagpunta ako sa Manila kasi gusto kong masala sa Philippine team. Kaso di ako nakuha, na-reject ako. Dahil di raw ako marunong. So napilitan ako mag-pro at the age of 16. ‘Yun ang dahilan nun,” pasabot sa eight-division world champion.
Si Philippine Olympic Committee (POC) president Abraham “Bambol” Tolentino maoy unang nibutyag kabahin sa tinguha ni Pacquiao nga maka-qualify sa Olympics.
Matod ni Tolentino nga puwede pang makakuha og tiket si Pacquiao alang sa Paris Games pinaagi sa duha ka Olympic qualifying tournaments nga ipahigayon sa sayong bahin sa 2024.
Puwede sab kini niyang mahimo pinaagi sa Universality rule, nga aprubhan sa International Olympic Committee (IOC).
Sa kasamtangan, adunay gibug-aton nga 66 kgs. si Pacquiao ug puwede siyang mopili og weight categories nga 63.50 kgs. o 71 kgs. nga naa sa Paris boxing program.
Ang professional boxers taodtaod na sab natugtan nga moaway sa Olympics.
Sa miaging 2020 Tokyo Olympics, 43 sa 186 competitors ang professional boxers. (ESL)