Grabe na kaayo ang kahimtang sa trapiko karong panahuna sa bisan asang dapit sa dakbayan sa Sugbo ug Mandaue. Nagkadaghan ang mga sakyanan sa kadalanan.
Unsaon pagsulbad ang nagkagrabeng kahimtang sa trapiko? Usa ka urban planner niingon nga public transport ang solusyon. Ang buot pasabot ini mao ang Cebu Bus Rapid Transit (CBRT) ug uban pa.
Usa lang tingali kini sa solusyon kay di ni bugtong sulbad sa kahimtang sa trapiko. Ang ehemplo niini mao ang New York nga dunay public transport, apan grabe gihapon ang kahimtang sa trapiko, matod pa sa usa na ko ka relative nga nagpuyo na didto sulod sa katuigan.
Di lang didto, ang ubang mga nasod naa sab niini, sama sa China, Malaysia ug uban pa nga duna say maayong public transport.
Ang tumong man gud sa maayong public transport mao ang pagdasig sa mga tawo sa pagsakay niini ug di na mogamit og pribadong mga sakyanan.
Nagduha-duha ko sa pagtuo niini tungod kay samtang nagkarang-arang ang kahimtang sa mga Sugboanon, ganahan ning mamalit og sakyanan kay status symbol baya ni. Unsa may kapuslanan sa gipalit nga sakyanan kon ibilin lang sa balay?
ACCESIBILITY
Kadaghanan sa mga subdivision karon naa sa kabukiran ug kabungtoran nga way accessibility sa public transportation, gikan sa dapit ngadto sa main o bisan sa secondary road.
Unsa may mahitabo? Magdala gihapon sila sa ilang mga sakyanan kay comfort ang gipangita. Busa, kon duna may mga tawo nga di na mogamit sa ilang sakyanan, maihap lang tingali.
Lain sab nga rason niini mao ang availability sa public transport sa gabii. Sa kahimtang sa seguridad panahon sa kagabhion, mas luwas sakyan ang pribadong sakyanan, labina kon moagi og hilit nga mga dapit, nga sagad maoy gipuy-an sa mga adunahan.
Naa bay public transport, gawas sa taxi, nga mahiabot niini? Apan gabii, lisod gihapon ang pagsakay pauli sa imong dapit, wa nay labot sa kamahal sa pletihan karon.
LAING PAAGI
Sa ako nang gisuwat sa akong column katuigan na ang nanglabay, ang Singapore nihimo og lakang aron di managhan ang mga sakyanan sa kadalanan. Kadto rang mga adunahan nga dunay ika-afford nga mougom sa buhis ug uban pang mga bayranan ang nanag-iya og sakyanan.
Adunahan ang Singapore busa makaya kaayo unta sa iyang citizens ang pagpalit og mga sakyanan. Apan tungod sa kalisod sa pagpanag-iya tungod sa buhis, rekisitos ug road user’s fee, di daghan ang namalit og sakyanan.
Apan lisod ning buhaton sa atoang kagamhanan tungod kay ang industriya sa transportasyon tipik man sa atoang ekonomiya.
Tingali, dinhi mosulod ang mga imprastraktura sa mobility sa atoang kadalanan. Gikinahanglan ang lapad nga sidewalks ug protected bike lanes aron magdasig sa katawhan sa paglakaw kon duol ra ang destinasyon ug pagsikad kon medyo layo.
Karon man gud, makigpatentiro ka sa mga sakyanan kon maglakaw ka sa dalan. Kuyaw kaayo nga maigo ka sa sakyanan, labina sa tarantadong mga nagmotorsiklo.
