Halos maghilak ang adlaw nga way aksidente nga naglambigit og motorsiklo sa dakbayan ug lalawigan sa Sugbo nga nikutlo og mga kinabuhi.
Wa kitay data gikan sa kapulisan o kaha sa Land Transportation Offce (LTO 7) apan, base sa mga taho sa social media, radyo ug mantalaan, nagsunodsunod ang kaso sa vehicular accidents sa motorsiklo.
Dunay ubang kaso nga gitawag og self accident o walay kontrata nga laing sakyanan. Basta nabangga o nahug sa bug-aw.
Niadtong Sabado, Septiyembre 16, 2023, alas 10:15 sa buntag, duha ka mga bigbike ang nagkabangga sa kurbada nga dalan dapit sa West 35, Transcentral Highway, Barangay Gaas, lungsod sa Balamban.
Sumala sa kapulisan, tulo ang nangamatay. Ang drayber sa motorsiklo padulong sa dakbayan sa Sugbo ug ang drayber iyang gikasugat uban sa angkas niini.
Dugang sa kapulisan, usa niini ni-overtake og sakyanan sa kurbadang dalan hinungdan nga nakabangga ang gikasaugat nga laing motorsiklo.
Tungod sa kakusog sa dagan sa duha, dugang sa kapulisan, grabe ang impact sa panagbangga. Nangalagpot ang mga sakay ug wala na mahitsura ang duha ka mga motorsiklo.
Mga pangutana, dili ba normal sa lagda sa trapiko nga dili mo-overtake sa eskina o kurbada nga dalan? Dili ba mominor man usab? Hinuon, mga imbestigador na ang mosubay sa maong kaso.
Apan ang punto, nganong daghang motorsiklo ang nalambigit sa duguong panghitabo?
Kini ang angay sutaon sa LTO. Basin dunay kakuwangan sa edukasyon sa pagmaneho o kaha ang pagbutang og mga pasidaan o traffic signages sa kadalanan.
Lakip sa presensiya sa awtoridad aron pag-monitor alang sa pag-speed limit sa mga sakyanan ug ang hugot nga pagpatuman sa ubang lagda sa pagmaneho.
Kini aron malikayan o kaminosan ang aksidente. Mapalambo ang kaluwasan sa pagsakay ug pagmaneho og motorsiklo nga sakyanan sa masa. Daghan na niini ang gihimong habalhabal karon.
Kon magbinantayon ang tanan, wa nay daghang maghilak tungod sa kalit nga pagpanaw sa mahal sa kinabuhi.
