Mag-live-in partners ang gipamusil-patay samtang nangatulog sulod sa ilang lawak sa balay sa Sitio Naba, Barangay Mambaling, dakbayan sa Sugbo, ala 1:40 sa kaadlawon sa Dominggo, Septiyembre 17, 2023.
Ang mga biktima giila nga silang Rolando Bangkal alyas ‘Lando’ ug Relina Tinapay alyas ‘Itang’ nga pulos hingkod ang pangidaron ug molupyo sa naasoy nga lugar.
Sa imbestigasyon sa Mambaling Police Station nga ubos sa superbisyon ni Police Major Jonathan Bethooven Taneo nasuta nga duha ka wala mailhing mamumuno nga nagsul-ob og full-face helmet ug naka-jacket, ningsulod sa balay sa mga biktima.
Walay daghang estorya diretso kinig pamusil sa makadaghang higayon gamit ang wala matino nga kalibre sa armas, dugang asoy ni Taneo.
Naigo sa nagkadaiyang bahin sa ilang lawas ang mga biktima nga maoy nakaingon sa ilang hinanali nga kamatayon.
Sa gihimong background investigation sa Mambaling Police Station, base sa pamahayag sa mga nakaila niini, nasayran nga ang duha nalambigit matod pa sa illegal nga drugas.
Apan ang kapulisan nagpadayon sa pagsubay kinsa ang maong mga mamumuno ug motibo sa krimen.