Dear Noy Kulas,
Tagoa lang ko sa ngan nga Jason. Minyo ko ug duna mi mga anak sa akong asawa. Siya ra ang naay work while ako nataktak adtong pandemic ug wa na ko nakabalik og work.
Kaniadto sa ulitawo pa ko, nakasuway ko sa pagka callboy kay gwapo lagi ko ug dunay barog. But closet ang akong work kay sagad sa akong mga customer closet nga mga bayot ug gurang nang mga babayeng minyo. Paghuman nako sa college niundang na sab ko kay naa na man koy work.
Kay naikog na ko sa akong asawa, sige ko og pang-apply og work but wa ko nadawat. Karon sa usa ka kompaniya nga ako untang giaplayan, dunay guwang nga babaye nga sa akong estimate mga almost 60, nangayo og number nako. Ako ra pud gihatagan kay namasin kong makatabang sa akong pag-apply, wa man diay? Unsay tuyo? Sex.
Dako ang iyang offer sa akoa ug natintal ko. Usa diay siya sa owners but di siya gustong madawat ko aron way makabantay sa amoa. Dagko og hinatagan si Maam kada lapaay namo. Nakapalit ko og motor ug pasangil ko sa akong asawa nga sideline nako habalhabal.
Mga eight months na mi ni Maam ug gusto na kong mokalas kay maayo na man ang akong kita sa pagpamasahero pero pwerte niyang hilak kay mingawon na kuno siya nako. Naluoy ko kay sincere kaayo siya. Bisan na lang kuno magkita mi twice a month. Noy, unsa may akong buhaton?
JASON
Son,
Naa ra gyud na nimo. Nakonsensya ka? Mas angay kang makonsensya kon magpadayon ka sa inyong relasyon nga mahulog nimo siyang gihukhokan. Mas makonsensya ka kay nanglimbong ka sa imong asawa. Ayaw kakonsensya nga mobiya kaniya kay makaayo man sab niya ug sa imoha. Mahimo ra siyang mangita og lain.
Ayaw na pagsulod og balik sa imong kagahapon kay di na maayo. Nanggamit ka og tawo so, duha ang imong nalimbungan. Ang pamilya sa imong Maam kon duna man ug ang imong asawa. Bisan magkinaunsa, panginabuhi og matarong. Okay na nang pagkahabalhabal, biyai ang literal nga meaning ani.
NOY KULAS
rojval69@yahoo.com
