Usa sa dako ug inadlaw nga problema sa trapiko sa Sugbo mao ang pag counterflow sa kadaghanan sa mga motorsiklo. Duna say pipila ka four-wheeled nga mga sakyanan nga naghimo usab niini.
Sa panahon nila ni kanhi Cebu City mayor Tomas Osmeña ug kanhi Mandaue City mayor Luigi Quisumbing, gipatuman ang estrikto’ng mga lagda sa trapiko, apil na ang pagdakop sa mga drayber nga nag-counterflow.
Ang duha ka kanhi mga local chief executive nangaparot sa re-election, gituohan nga usa sa nakapahuyang kanila sa pulitika mao ang ilang polisiya sa hugot nga pagpatuman sa mga lagda sa trapiko, labina sa counterflowing.
Sa Cebu City, ang Cebu City Transportation Office (CCTO) wa nagpatuman sa pagpanakop sa mga mo-counterflow. Mas estrikto pa sila anang mga motorsiklo nga manubay sa mga sidewalk.
Pasagdan lang gani ang mga drayber sa mga sakyanan nga manghunong sa mga pedestrian lane bisan kon kini sayop, kuyaw sa mga pedestrian nga manglabang nga madasmagan sa nagdulong nga mga sakyanan kay masalipdan man sila.
Mabasol ba ang CCTO niini? Tigpatuman lang sila sa mga lagda, apan dunay tig-umol sa mga polisiya nga mao ang mga pulitiko nga kanunay nagtan-aw sa ilang kaugalingong interest. Naghuna-huna sila sa ilang political survival.
Apan tan-awa, nagkagidlay ang atoang mga karsada, mangatanggong ang publiko og tagpila ka oras. Ang biyahe nga 30 minutos ra unta, mahimong duha ngadto sa tulo ka oras.
Naa kanunay ang mga aksidente tungod sa counterflowing nga nahimo nang normal ug naandan. Apan tan-awa, tungod sa counterflowing, tulo ka mga kinabuhi nakalas niadtong Sabado.
Kon ang mga tighimo og polisiya kanunay naghuna-huna sa political survival, bisan pag moabot na ang 10 ka tuig gikan karon, ang Singapore-like nga damgo ni Mayor Michael Rama magpabiling damgo ug daman kay bisan sa karsada mahadlok mopatuman sa balaod.
