Usa ka 25 anyos nga lalaki samdan sa liog human kalit nga gilaslas sa usa ka lalaking giingong wa sa maayong pangisip gamit ang buak nga botelya niadtong Dominggo sa hapon, Septiyembre 17, sa Groto, Barangay Poblacion, siyudad sa Toledo.
Ang ngan sa suspek wa pa nakuha sa kapulisan sa pagsuwat ning taho, nagpuyo sa dapit.
Ang biktima giilang si Gary Guillano, ulitawo, taga Brgy. Talavera, Toledo City. Siya nagpaayo sa iyang motorsiklo sa usa ka motorcycle shop sa naasoy nga dapit.
Matod ni Police Staff Sgt. Jonever Manabat, imbestigador sa Toledo City Police Station, ubos sa pagdumala ni Lt. Col. Manolo Salvatierra, hepe, ang biktima kalit nga gilipot sa suspek ug way igong katarungan gilaslas ang liog niini nga niresulta sa iyang pagkalandig sa tambalanan.
Samtang ang suspek nadakpan ug gitanggong na sa kapulisan. / DVG
