Seguradong pistahan na sab ning bag-o lang milusot nga bill sa Senado, ang bill bahin sa absolute divorce. Ang House of Representatives aduna na say susama nga bill nga milusot na sab sa usa ka panel deliberation.
Buot ipasabot, naghinayhinay na og kamang ang maong bill ug di pa maklaro kon makalusot ba gyod kaha ang maong bill ug mamahimong balaod.
Tungod niining maong bill, mobalik na sab kalagsik ang panaglalis kon angay ba gyod nga palutson nga balaod ang absolute divorce dinhi sa Pilipinas.
Mabuak na sab ang katawhan sa pabor ug di pabor.
* * *
Sa mga pabor sa maong giplano nga absolute divorce, usa sa hinungdan nga miuyon sila mao ang pangutana nga unsa may kapuslanan nga magpadayon sa kaminyuon kon wala nay kalipay ang bana o asawa. Kon kanunay na lang nga mag-away, kon kanunay na lang kagubot, kon kanunay na lang nga way panagsabtanay ug kon bugnaw na ang panaghigugmaay sa bana ug asawa, nganong padayonon pa man ang salag sa kaminyuon?
Sa mga misupak sa maong plano, bug-at sab ang ilang rason nga kon adunay problema ang magtiayon, dili ang panagbulag ang solusyon kondili pangitaan og paagi ang maong problema. Normal ra daw nga mag-away kay mga dagko na gyod nagkita, gani mag-away man ang kaluha nga parehas og gigikanan, unsa na kaha ang dili kaluha?
Daghan ug nagkalandrakas ang mga batikos batok ug sa pabor sa absolute divorce. Pulos bug-at ang ilang mga rason ug lisod hukman kon kinsa gyod ang angay pamation ug tumanon.
* * *
Pero adunay daghan nga mga batan-on karon nga nawad-an na og plano nga magminyo.
Imbes mangita og bana, anak na lang ang ilang gipangita. Buot ipasabot, nawagtang na ang ilang gana nga magminyo. Unsa may ilang rason?
Matod pa, daghan sa ilang mga barkada nga naminyo na ang ilang nahibaw-an nga dili na malipayon, ang uban gani nagbuwag na ug matod pa, miserable kuno kanunay ang ilang kinabuhi.
Tungod niining maong mga kasinatian, sama sa gibuboan og tubig ang ilang gana nga magpakasal. Kining mga klaseha sa mga batan-on ang apil sa grupo sa wa nay pagsalig sa kaminyuon bisan kon nagpabilin ang ilang gusto nga makahimo lang gihapon og pamilya pinaagi sa anak, nga wala nay bana.
Ngano man kini?
Epekto ba kini sa padayon nga kaguliyang sa mga magtiayon nga maoy hinungdan nga naapektuhan ang panglantaw sa kinabuhi sa ilang mga anak?
* * *
Pero bisan pa man kon maaprobahan gyod ang balaod bahin sa absolute divorce, dili pa gihapon sayon ang pagkuha sa diborsiyo.
Ngano man?
Tungod kay kinahanglan nga mogasto pa og dako ang gusto niini sama sa gasto sa abogado, gasto sa paghikay sa mga papeles ug uban pa nga mga kagastohan.
Dili sayon-sayon ang pagkuha niini ug moagi pa kini og taas nga lanat sa panahon. Buot ipasabot, bisan pa man kon gustohon gyod nila, dili lang gihapon sayon ang pagkuha niini kay nagkinahanglan kini og dakong pondo para sa mga kagastohan.
Kadtong mga magtiayon nga nihit ug alanganin ang ilang pondo, moutong na lang og igo na lang sa pagpangandoy.
Ang uban nga di na gyod makaagwanta, magbulag na lang nga way diborsiyo-diborsiyo.
Mao kini ang pangutana nga nindot tubagon - asa may mas maayo, ang magbuwag nga way diborsiyo-diborsiyo o kanang magbuwag nga adunay diborsiyo?
