Ang grabeng baha ug lunop nga masinati panahon sa pagbunok sa uwan taudtaod nang problema sa tanang local government units (LGUs) sa Metro Cebu, labina sa dakbayan sa Sugbo, Mandaue ug Talisay.
Ug ang matag LGUs, uban sa ilang congressional representatives, naghimo na og daghang mga proyekto nga nigasto og miniyon ka pesos apan nahimong sama sa walay bili tungod kay padayong nasinati ang naasoy nga problema.
Sa paspas nga pagtuyok sa ekonomiya sa Sugbo, ang baha ug lunop nakaapekto na kaayo sa negosyo tungod sa pagkabalda sa transportasyon. Nakahasol sa panginabuhi sa katawhan, adunahan ug kabos. Dayag nga kamatuoran nga dili masulbad ang maong problema kon ang matag LGU mag-iyahay sa pagpatuman og proyekto, human ang problema gisaw-an sa silingang LGUs busa kinahanglan nga dunay hiniusang pwersa sa pagsulbad niini.
Pananglitan, ang mga suba ug kasapaan nga nagliko-liko nga nagtagos sa managsilingang LGUs sama sa Mahiga Creek nga naa sa utlanan sa dakbayan sa Sugbo ug Mandaue. Bisan sa paglimpiyo sa basura, maayong koordinado sa duha ka LGUs
Sa panaw sa pagpangita og solusyon, walay ulahi sa paghimo og inisyatiba labina nga dunay koordinasyon. Busa, dalaygon ang pagpahigayon sa ikaduhang round table discussion tali sa dakbayan sa Sugbo ug Mandaue niadtong Lunes, Septiyembre 18, 2023.
Ang table discussion gitambungan sa mga representante sa Department of Public Works and Highways (DPWH) 7, Sixth District Engineering Office, Office of the Presidential Assistant for the Visayas (OPAV), Cebu City government officials, ug ubang stakeholders.
Ang unang roundtable meeting gipahigayon sa Septiyembre 14, 2022. Subay sa taho sa mantalaan, radyo, telebisyon ug social media, daghang nindot nga gihisgutan ug rekomendasyon. Nakanindot sa naasoy nga kalamboan, dunay koordinasyon sa duha ka LGUs.
Apan ang mas gipaabot sa katawhan mao ang implimentasyon. Kanus-a sugdan. Labing dali nga aksiyon, mas undanon.
