Editoryal: Problema sa baha

SAMA sa nangaging mga baha, ang basura apil sa gibasol sa grabeng baha sa Metro Cebu niadtong Martes.

Laing gitumbok mao ang informal settlers ug kakuwang sa master development plan alang sa Sugbo.

Komplikado ang problema apan mas dako kaayo og natampo ang mga basura nga anaa sa kasapaan ug mga kanal. Nakasampong kini sa mga agianan sa tubig ug nakapamabaw sa kasapaan.

Mao ni ang hinungdan sa pagsuyla sa tubig matag higayon nga mouwan.

Di lang ang mga tawo nga namuyo daplin sa kasapaan ang guilty niini, apil na ang mga lumolupyo nga magpataka lang sa paglabay sa ilang mga hugaw ug basura.

Bisan layo ra sa sapa ang ubang mga dapit, matag uwan ibanlas ang basura sa mga kanal nga konektado sa mga sapa-sapa.

Busa, di lang ang pagbaya sa kagamhanan sa paglimpyo sa mga estero, paghakot kanunay sa mga basura ug paghimo og lapad nga plano sa pagsulbad sa baha, ang mabasol sa problema karon.

Guilty sab ang publikong mapasagaron, way paghuna-huna nga ang pagpataka sa paglabay og basura nakamugna og dakong problema.

Dugay na kaayo kining mao nga problema. Ang kagamhanan nihimo na og mga lakang aron sa pagsulbad niini.

Apan kon ang kagamhanan lang ang maghimo og lakang, way partisipasyon ang katawhan, kawang lang ang tanan.

Ang katawhan tipik sa solusyon sa problema sa baha. Asa ka man, sulusyon sa problema o tipik sa problema?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph