Girekomendar sa National Bureau of Investigation (NBI) ang pagpasaka og mga reklamo batok sa unom ka mga indibidwal, lakip ang tulo ka mga opisyal sa gobiyerno, tungod sa giingong pagtago sa mga sibuyas bombay, nga gibasol sa pagsaka sa presyo niini niadtong 2022.
Si Department of Justice (DOJ) Secretary Jesus Crispin Remulla miingon sa usa ka press conference sa Lunes, Septiyembre 18, 2023, nga ang NBI mihimo sa rekomendasyon subay sa pagpahigayon og imbestigasyon sa pagbaligya sa sibuyas bombay niadtong Disyembre, sa dihang ang presyo nisaka ngadto sa P587 matag kilo, nga gimando ni Presidente Ferdinand Marcos Jr.
Wala hinuon gibutyag ni Remulla ang pagkatawo sa unom ka mga indibidwal.
Matod niya nga gawas sa mga reklamo kalabot sa hoarding ug profiteering, mahimo usab nga adunay mga kalapasan nga misangpot sa pagmaniobra sa presyo ug pagsabotahe sa ekonomiya.
“Kasama ang mga opisyal sa gobiyerno rito sapagkat ang tingin namin sila po ay talagang lumalabas na may sala sa pagkakataong ito,” matod niya.
“Ito ay simula pa lang. Marami pa hong kasong ipapafile at tuloy-tuloy ang imbestigasyon ng NBI,” siya nidugang.
Si Justice Undersecretary Geronimo Sy, pangulo sa investigation task group on agri-smuggling, niingon nga base sa ilang imbestigasyon, ang farmgate price o gasto sa produksyon sa sibuyas sulod sa nahisgutang panahon anaa lang sa P8 ngadto sa P15 matag kilo.
“And this is now the basis for hoarding and profiteering. Kasi ang sabi daw wala na silang stocks, wala nang available, pero nung kinontrata at P500 plus, nagkakaroon ng stocks,” matod ni Sy. / TPM sa SunStar Philippines