BSKE sa Negros Or. mahinayon; ipaubos sa Comelec control

COMELEC CONTROL: Si Commission on Elections (Comelec) Regional Director Lionel Marco Castillano nipahibawo nga mahinayon ang Barangay and Sangguniang Kabataan Elections (BSKE) sa Negros Oriental sa Oktubre 30, 2023 apan ipaubos kini sa control sa ilang buhatan. / ARNOLD Y. BUSTAMANTE
COMELEC CONTROL: Si Commission on Elections (Comelec) Regional Director Lionel Marco Castillano nipahibawo nga mahinayon ang Barangay and Sangguniang Kabataan Elections (BSKE) sa Negros Oriental sa Oktubre 30, 2023 apan ipaubos kini sa control sa ilang buhatan. / ARNOLD Y. BUSTAMANTE

Gikompirmar sa regio­nal director sa Commission on Elections (Comelec 7) manlalaban Lionel Marco Castillano nga duna nay gipagawas nga hukom ang Comelec En Banc sa paghinayon sa Barangay and Sanguniang Kabataan Elections sa Oktubre 30, 2023 apan ipaubos sa Comelec control ang Negros Oriental.

Matod ni Castillano nga atol sa Regional Joint Security Control Center RJSCC meeting sa Martes, Septiyembre 19, 2023, uban sa kapulisan, Armadong Kusog sa Pilipinas ug ubang mga ahensiya sa gobiyerno, wala pa siya nakadawat sa reso­lusyon ug unsay parameter sa pagpatuman sa Comelec control sa Negros Oriental.

Apan iyang gipasabot nga ang rason kon nganong gipaubos sa Comelec control ang maong probinsya mao ang pagsiguro nga mapahigayon nga luwas, hapsay ug malinawon ang BSKE 2023 nga walay mga insidente nga mahitabo.

“It is just that as a precautionary and proactive measure the Comelec En Banc has decided placing Negros Oriental in Comelec control,” matod ni Castillano.

Subay niini, daghang mga uniformed personnel ang ipakatap sa Negros Oriental gikan sa kapulisan ug sa kasundalohan aron pagsiguro nga walay hulga sa kagubot nga mahitabo sa maong probinsya.

Hinuon atol sa RJSCC meeting uban sa kapulisan sa Central Visayas ug sa AFP, gipasaligan ang Comelec nga wala nay angay nga kabalak-an sa Negros Oriental tungod kay nakontrolar na nila ang mga armadong grupo nga naghulga sa kahusay ug kalinaw ning nagkaduol ang election.

Giangkon ni Castillano nga kon ang usa ka lugar ipaubos sa Comelec control, sila ang magbuot kinsa ang ibutang nga hepe sa kapulisan.

Apan masaligon siya sa lide­rato ni Brig. General Anthony Aberin ilabi na sa gibutang nga hepe sa Negros Oriental Police Provincial Office tu­ngod kay sila ang nasayod sa natad sa siguridad.

Si Police Lieutenant Colonel Gerard Ace Pelare, spokesperson ni Aberin, nibutyag nga andam na ang kapulisan sa Central Visayas sa ipatuman nga hugot nga siguridad.

Duna nay daghang mga police ug AFP personnel nga gipadala sa Negros Oriental sukad pa sa miaging buwan apan kon gikinahanglan ang dugang pwersa gikan national headquarters pinaagi sa kagustohan sa Comelec, mahimo kining dugangan.

Nipasabot si Pelare nga lahi na karon ang Negros Oriental kay daghan na sa mga armadong tawo nga dunay mga pending warrant of arrest ang nangadakpan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph