Taliwala sa padayon nga pagsaka sa presyo sa lana, gisugdan na sa Land Transportation, Franchising, and Regulatory Board sa Central Visayas (LTFRB 7) ang pag-apod-apod sa hinabang gikan sa Fuel Subsidy Program alang sa mga operator ug drayber sa pampublikong transportasyon sa rehiyon.
Si LTFRB 7 Director Eduardo Montealto nikompirmar sa SunStar Cebu pinaagi sa text message niadtong Lunes, Septiyembre 18, 2023 nga nagsugod na ang distribution sa subsidy niadtong Septiyembre 14, 2023.
Ang mga pundo direkta nga gi-download sa mga operator ug mga drayber nga adunay mga kard.
Apan matod niya nga dunay mga operator ug driver nga wala makadawat sa pundo sa ilang account ug nagpaabot pa nga ma-reload kini sa ilang account.
“Ang importante dinhi kay na-release, pero siyempre, mahimong hinay-hinay ang distribution,” matod ni Montealto.
Niadtong Septiyembre 8, ang Department of Budget and Management (DBM) nipagawas sa P3 bilyunes nga pundo alang sa one-time Fuel Subsidy Program, nga nakabenepisyo sa labing menos 1.36 milyunes ka public utility vehicle (PUV) drivers ug operators sa tibuok nasod.
Ang modernized public utility jeepneys (PUJ) ug Utility Vehicle Express (UVE) nakadawat og P10,000 matag usa; P6,500 matag usa alang sa tradisyonal nga PUJ ug UVE, public utility buses, minibus, taxi, shuttle services taxi, transport network vehicle services, tourist transport services, school transport services ug filcabs; P1,000 sa traysikol; ug P1,200 alang sa delivery services. (EHP)