Patay nang nidangat sa tambalanan ang usa ka 66-anyos nga lalaki human madasmagi samtang nagmaneho sa iyang “tora-tora” nga motorsiklo sa usa ka sports utility vehicle (SUV) sa Lunes sa alas 7 sa gabii, Septiyembre 18, 2023 sa highway sa Brgy. Sima, lungsod sa Dumanjug, habagatang kasadpang Sugbo.
Ang biktima giila ni Sr. Master Sergeant Joseph Bugtai, traffic police investigator nga ubos sa pagmando ni Capt. Jan Ace Elcid Layug, nga si Felito Parojinog, minyo, negusyante og inasal manok, taga Brgy. Poblacion, Dumanjug.
Samtang ang drayber nga nakadasmag kaniya giilang si Anecito Libradella Libron, 55, taga Montpellier, Alegria, Cebu.
Mato ni Bugtai nga si Parojinog nga nagsubay sa karsada kalit nga niliko sa wala samtang si Libron nagsunod kaniya.
Tungod sa kakalit, wa na makahigayon sa pag-brake si Libron, iyang nadasmagan si Parojinog.
Ang biktima gidali sa pagdala sa Barili District Hospital apan gi-declare nga dead on arrival sa attending physician gumikan sa kadaut nga naangkon niini sa nagkadaiyang bahin sa lawas niini tungod sa kakusog sa impact.
Kasong reckless imprudence resulting to homicide and damage to property ang atubangon ni Libron, kinsa sa pagsuwat ning taho gitanggong pa sa police station. (DVG)
