Drug den nga nahimutang sa Sitio Lupa, Barangay Sapangdaku, dakbayan sa Sugbo gironda sa mga sakop sa Philippine Drug Enforcement Agency 7 (PDEA 7) uban sa Guadalupe police station 9 alas 7:50 sa Lunes sa gabii, Septiyembre 17, 2023 nga niresulta sa pagkasikop sa upat ka mga tawo, apil na ang drug maintainer .
Ang mga suspek nga naabtan sa anti-illegal drug operation giilang sila si Joseph dela Torre Sanchez, 40, giingong drug den maintainer; Jinus Abella, 26, habal-habal driver; Ranel Gabunada, 39, construction worker; ug Jacques Ragasajo, 47, way trabaho.
Nasakmit sa mga operatiba ang 12 ka mga pakete sa gituohang shabu nga motimbang og 50 gramos nga dunay street drug price (SDP) nga P340,000, lakip na ang buy-bust money, cellular phone ug mga drug paraphernalia.
Matod ni Leia Alcantara, information officer sa PDEA 7, nga usa ka buwan nila nga gipaubos sa case build up ang maong balay suyopanan human nakadawat og report gikan sa usa ka concerned citizen.
Kalapasan sa Section 5, 6, 7, 11 ug 12 Article II sa Republic Act 9165 kun Comprehensive Dangerous Drugs Act of 2002 ang atubangon nga kaso sa mga suspek. (AYB)
