Mokabat sa 500 ka mga kandidato sa Barangay and Sanggunian Kabataan Elections (BSKE) sa dakbayan sa Mandaue ang ningpirma og peace covenant sa Miyerkules, Septiyembre 20, 2023, aron masiguro ang luwas ug hapsay nga BSKE sa dakbayan karong Oktubre 30.
Si Lieutenant Colonel Franco Rudolf Oriol, Mandaue City Police Office (MCPO) deputy city director for administration ug tigpamaba, niingon nga ang katuyoan sa maong kasabutan mao ang pagtabang sa mga kandidato sa BSKE nga masabtan ang ilang tahas sa pagsiguro sa luwas ug malinawon nga BSKE ug pagpadayag sa ilang sinseridad sa serbisyo publiko.
Ang seremonyas, gipasiugdahan sa MCPO, gipahigayon sa National Shrine of St. Joseph Church sa Barangay Centro, Mandaue City sa Miyerkules, Septiyembre 20, gitambungan usab sa mga representante sa law enforcement agencies sa Mandaue sama sa Department of the Interior and Local Government (DILG) Mandaue Office, Philippine National Police (PNP), Armed Forces of the Philippines (AFP), Philippine Navy, lakip na ang Commission on Elections (Comelec) Mandaue Office. / HIC