Sugdan ning Sabado sa hapon, Septiyembre 23, 2023, ang bag-ong season sa Cebu Schools Athletic Foundation Inc. (CESAFI) basketball tournament sa Cebu Coliseum.
Sama sa naandan, modugkat sa opening ceremonies mao ang tradisyunal nga grand palabas sa alas 12:30 sa udto nga buwakan sa indigay sa 2023 Miss CESAFI sa high school ug college divisions.
Human niini, mag-engkuwentro ang Don Bosco Technological Center (DBTC) Greywolves batok Cebu Eastern College (CEC) Dragons sa high school division sa alas 4:00 sa hapon.
Sa main game, magpinaksitay dayon ang parehong bag-ong mga miyembrong puwersa nga mao ang Felipe R. Verallo Memorial Foundation College ug Cebu Roosevelt Memorial Colleges nga pulos gikan sa Bogo City.
Nagkanayon si CESAFI deputy commissioner Danny Duran nga ning higayuna, gilauman ang mas makapaikag nga mga aksyon gumikan sa paghiabot sa Verallo ug Roosevelt.
“Mas exciting karon kay naa man bag-ong teams,” matod ni Duran.
Hinuon giangkon ni Duran nga wala pa siya’y ideya kon unsa ang kapabilidad ning bag-ong sulpot nga mga puwersa.
“Pero segurado, maka-compete gyud na sila kay pride na sa ilang eskuwelahan,” dugang ni Duran.
Nahisgutan sab ni Duran ang University of the Philippines (UP)-Cebu Fighting Maroons, nga nahimong miyembro sa CESAFI sa miagi pa untang tuig apan karon pa mohamag sa aktuwal nga kompetisyon.
Wala ning-apil ang Fighting Maroons sa miaging season gumikan kay sa ilang tan-aw, dili pa sila makasukol og insakto sa karaang miyembro sa CESAFI nga gipangulohan sa defending champions University of the Visayas (UV) Green Lancers.
Ang kombati sa ubang sporting events sa liga sugdan sa umaabot pa nga mga semana.
Gawas sa basketball, ang ubang sporting events sa CESAFI mao ang volleyball, athletics, badminton, chess, dancesports, e-sports, football, futsal, karatedo, scrabble, swimming, table tennis, taekwondo, tennis, ug beach volleyball lakip na ang demonstration sports nga arnis ug weightlifting.