Ang power distribution firm nga Visayan Electric niduyog sa global nga panawagan sa pagsagop sa electric vehicle (EV), uban pa sa pag-deploy sa ilang unang electric vehicle alang sa pilot testing sa kompaniya.
Niadtong Miyerkules, Septiyembre 20, 2023, ang presidente ug chief operating officer sa Visayan Electric nga si Raul Lucero, nibutyag nga ang Aboitiz-led power distribution unit hinayhinay nga nagbalhin sa paggamit sa zero-emission nga mga sakyanan.
Matod ni Lucero, mas limpyo ug mas episyente ang mga sakyanan nga gigamitan og baterya kon itandi sa mga sakyanan nga gigamitan og gasolina.
“We believe that electric vehicle provides benefits to the environment, benefit to the economy, and to the overall quality of life. Why? Because these electric vehicles do not produce tailpipe emissions. It reduces air pollution and this is a significant step towards combating climate change and improving the air quality in our cities,” matod ni Lucero.
Dugang niya, “And they are also very efficient and possibly lower maintenance cost for these vehicles.”
Ang EV gigama sa China-based BYD Company nga anaa sa P2-P2.5 milyunes nga adunay battery lifespan nga pito ka tuig. Ang BYD giingon nga mao ang pinakadako nga tiggama sa EV sa kalibutan.
Kon puno na, kini nga EV makadagan og mga 120 kilometros. Kini usab adunay usa ka paspas nga pag-charge nga kapabilidad, nga nagtugot niini nga maabot ang usa ka bug-os nga 100 porsyento nga charge nga wala’y usa ka oras.
Matod ni Lucero nga gusto nilang sulayan ang kapabilidad sa sakyanan ug i-validate ang mga feature nga gisaad sa BYD.
Interesado usab sila ilabina sa pagtimbangtimbang sa kahaom sa EV alang sa pagbiyahe sa mga bukirong dapit.
Sa pagkakaron, ang Visayan Electric adunay 50 ka fuel-powered vehicles, walay labot ang crane ug boom trucks.
“Next year, we will add another electric vehicle and possibly an electric motorcycle and we will use this in our day-to-day operation,” dason ni Lucero.
Ang pagsagop sa EV sa Visayan Electric kabahin sa fleet transformation program niini isip suporta sa Electric Vehicle Industry Development Act (Evida), ug kontribusyon ngadto sa mas lunhaw ug mas limpyo nga paglihok sa nasod.
Gimando sa Evida ang industriyal ug komersyal nga mga kompaniya nga adunay labing menos lima ka porsyento nga bahin sa ilang mga armada nga naglangkob sa mga electric vehicle.
“As a leader in the energy industry, we want to incorporate innovations that will improve the efficiency and sustainability of our operations. The world is facing developments in climate change, global connectivity, population growth, urbanization, and digitalization, and these changes demand that businesses like ours transform to remain relevant,” matod ni AboitizPower president and chief executive officer Manny Rubio. / KOC