GITIN-AW sa Commission on Elections (Comelec) sa Davao Region niadtong Huwebes, Septyembre 21, 2023, nga bisan pa sa nagbaha nga reklamo sa mga molupyo sa tibuok rehiyon bahin sa giingong pagpamalit og boto alang sa Barangay Sangguniang Kabataan Elections (BSEK) karong tuiga, wala kini makonsidera sa komisyon isip pormal ug mga legal nga reklamo tungod sa kakuwang sa mga ebidensiya.
“You have to put in writing. You have to file necessary complaint affidavits with all the evidence and the affidavit ng mga witnesses nila. So far diri sa regional office, wala pa mi nakadawat of affidavit complaint talaga,” pagklaro ni Atty. Gay Enumerables, acting director sa Comelec-Davao Region.
Apan ang Comelec-Davao Region magpahugot sa ilang implementasyon sa “Kontra-Bigay” aron nga pakusgan ang ilang pagmonitor sa giingong pagpamalit og boto sa matag barangay level sa tibuok rehiyon.
Sa pikas bahin, si Enumerables subling nagdason nga mga kandidato kinsa makalapas sa sayong pagpangampanya, indirekta man o direkta, masilotan ug makamulta subay sa Omnibus Election Code.
Ang sayong pagpangampanya mao ang balay-balay nga pagbisita sa mga kandidato, pagpanghatag og flyers, pagpamutang og mga tarpaulins, ug mag-advertise sa ilang kaugalingon pinaagi sa radyo ug social media.
Iya sab nga gipahimug-atan nga mga incumbent nga opisyales gitugtan sa paglusad og mga kalihukan sulod sa ilang area of responsibilities gawas sa wala mahaum nga "gift-giving, early aid distribution, or unusual social service" nga aktibidad kay mahulog gihapon kini sa premature campaigning.
“Ang election offense naay silot nga less than one-year but not more than six-years nga imprisonment tapos perpetual disqualification to hold public office, without probation,” pagklaro niya.
Base sa Section 80 sa Omnibus Election Code sa 1987 nga Konstitusyon, “it shall be unlawful for any person, whether or not a voter or candidate, or for any party, or association of persons, to engage in an election campaign or partisan political activity except during the campaign period”.