Laing 241 ka micro rice retailers sa Central Visayas (CV), 60 niini naa sa lalawigan sa Sugbo, nakadawat og P15,000 nga cash assistance gikan sa Nasudnong Kagamhanan sa Biyernes, Septiyembre 22, 2023.
Kini ang ikaduhang hugna sa mga micro rice retailer sa CV nga giila nga apektadong negusyante nga ningtuman sa mandatory price cap sa bugas.
Ang Department of Social Welfare and Development (DSWD 7) uban sa Department of Trade and Industry (DTI 7), Department of Agriculture (DA 7), ug Department of the Interior and Local Government (DILG 7), nipahigayon sa dungan nga pagtunol sa ayuda sa probinsya sa Bohol, Cebu, Negros Oriental, ug Siquijor niadtong Septiyembre 22, 2023.
Sa lalawigan sa Sugbo, ang payout gihimo sa DTI Cebu Provincial Office sa dakbayan sa Sugbo.
Kini nga mga benepisyaryo mao ang mga micro rice retailer nga gikan sa lungsod sa Alcoy (1), Argao (4), Balamban (3), Compostela (1), Consolacion (2), Minglanilla (6), ug Pinamungajan (1) ug sa siyudad sa Sugbo (5), Lapu-Lapu (12), Mandaue (16), ug Toledo (9).
Samtang, 65 gikan sa lalawigan sa Bohol, 76 gikan sa Negros Oriental, ug laing 40 gikan sa Siquijor ang nakadawat usab sa kinatibuk-ang P3.6 milyunes nga one-time financial aid ubos sa DSWD Sustainable Livelihood Program - Economic Relief Subsidy (SLP-ERS).
Gimando ni Presidente Ferdinand Marcos Jr pinaagi sa Executive Order No. 39 ang price cap sa regular milled Rice (RMR) sa P41 matag kilo ug well-milled rice (RMR) sa P45 matag kilo, aron pagsumpo sa pagsaka sa presyo sa bugas sa nasod.
Si Ines Cajegas, chief trade industry development specialist sa Consumer Protection Division sa Department of Trade and Industry (DTI) Cebu Province niingon nga ang maong mga nakadawat napili usab tungod sa pagtuman sa price cap sa pagsusi ug pag-verify sa mga awtoridad.
Dugang ni Cajegas, ang mga kuwalipikadong micro rice retailers mao usab ang mga rehistrado sa Business Permits and Licensing Office (BPLO), rehistrado isip sole proprietor sa DTI, unregistered rice retailers nga gi-validate sa market administrators, ug kadtong gi-verify sa DTI. /EHP