Mokabat sa 100 ka mga pamilya ug mga tag-iya og propriyedad nga nagpuyo sa F. Vestil Road sa Barangay Mambaling ug sa Barangay Talamban sa dakbayan sa Sugbo, ang kinahanglang mobiya sa ilang mga panimalay tungod kay ang gobyerno kinahanglan nga mopalit sa mga lote alang sa paghatag og dalan sa Cebu Bus Rapid Transit (CBRT) project.
Hinuon, ang Cebu City Hall nipasalig sa mga apektadong indibidwal nga sila mabayran ug walay pamilya nga mabakwit.
Bag-o lang giendorso ni Cebu City Administrator Collin Rosell ang usa ka sulat ngadto sa Cebu City Council nga pinetsahan og Agusto 30, 2023 nga sample letter of notice nga ipadala ngadto sa mga apektadong settlers ug property owners nga nagpuyo sa F. Vestil Road ug Talamban.
Ang Konseho, atol sa regular nga sesyon niadtong Miyerkules, Septiyembre 20, mi-refer sa endorsement ngadto sa City Legal Office alang sa pagsusi.
PACKAGE 2, 3
Ang dalan F. Vestil kabahin sa 10.65 kilometros nga CBRT Package 2, nga gilangkuban sa duha ka mga rota: ang usa gikan sa Kapitolyo Probinsyal paingon sa Cebu IT Park nga moagi sa Escario St., Gorordo Ave., Archbishop Reyes Ave. ug M. J. Cuenco Ave, samtang ang usa gikan sa Cebu South Bus Terminal (CSBT) paingon sa South Road Properties (SRP) nga motadlas sa N. Bacalso Ave.
Sa Talamban, adunay sugyot nga magtukod og terminal ubos sa CBRT Package 3.
Ang Package 2 sa CBRT nag_lakip usab sa terminal ug depot sa SRP.
Base sa miaging report sa SunStar Cebu, ang Department of Transportation (DOTr) wala pa maka-bid out sa Package 2, apan target sa ahensya nga masugdan na ang construction sa unang quarter sa 2024.
Subay sa memorandum of agreement nga gisudlan sa Cebu City Government ug DOTr niadtong 2016, ang Siyudad maoy nagdumala sa pag-angkon sa mga lote nga maapil sa CBRT alignment.
Matod sa suwat ni Rosell, ang kagamhanan kinahanglang mokuha sa propiyedad sa 38 ka mga tag-iya sa lote, 67 ka mga tag-iya sa estruktura, ug 18 ka mga tag-iya sa lote ug estruktura, sa duha ka mga dapit, F. Vestil Road ug Talamban.
Sa kinatibuk-an nga giila nga kabtangan, adunay 120 ka kabtangan sa F. Vestil Road, ug tulo sa Talamban.
Si Rosell, sa pakighinabi niadtong Dominggo, Septiyembre 24, nipasalig nga ang mga tag-iya og propiyedad makadawat og kompensasyon gikan sa gobyerno sa higayon nga makatuman sila sa mga kinahanglanon sa dokumentaryo.
Ang Siyudad gikinahanglan nga mopahibalo sa mga tag-iya sa propiyedad aron makahimo sila sa pag-andam sa gikinahanglang mga dokumento isip pruweba sa pagpanag-iya alang sa pagbayad sa kompensasyon agig pagsunod sa Republic Act 10752, o The Right-of-Way Act, ug sa CBRT Resettlement Action Plan.
Pipila sa mga kinahanglanon nga kinahanglan sundon sa mga tag-iya sa propiyedad naglakip sa:
Sertipikado nga tinuod nga kopya sa orihinal/pagbalhin nga sertipiko sa titulo sa propiyedad gikan sa opisina sa Registry of Deeds (kung ang propiyedad adunay titulo);
Certified true copy sa tax declaration sa lote gikan sa Cebu City Assessor’s Office;
Notarized waiver sa katungod sa tag-iya sa lote sa mga kita sa improvement kon ang tag-iya sa lote ug improvement owner, kon duha ka managlahing tag-iya nga adunay gilakip nga kopya sa duha ka valid ID sa tag-iya sa lote;
Tax clearance certificate of lot nga giisyu sa City Treasurer Office;
Clearance sa korte;
Bureau of Internal Revenue (BIR) tax identification number;
Duha ka ID sa gobyerno
Ang mga rekisitos isumiter sa CBRT Office nga nahimutang sa Cebu City Hall 15 ka adlaw human madawat ang notice.
Ang pundo alang sa kompensasyon sa mga apektadong tag-iya sa propiyedad maggikan sa DOTr ug ihatag sa Siyudad nga maoy mopadali sa relokasyon.
Matod ni Rosell, ang buhatan sa CBRT mag-ila usab kon kinsa niining mga tag-iya og propiyedad, ilabi na ang mga residente, ang kuwalipikado nga makadawat og makiangayon nga kompensasyon o relokasyon sa balay.
HEARING
Ang pangulo sa Division for the Welfare of Urban Poor (DWUP) nga si Anthony Librando, sa mensahe sa SunStar Cebu niadtong Dominggo, nagkanayon nga ang mga hingtungdan nga lugar kay commercial ug residential areas ug ang mga apektadong tag-iya nasayod na sa maong kalambuan, tungod kay aduna nay public hearing gipahigayon duha ka tuig na ang milabay.
Si Librando niingon usab nga ang City Government mopalit og lote samtang ang National Housing Authority (NHA) maoy motukod sa medium-rise building alang niadtong dili mga residente nga kwalipikado alang sa housing program. / JJL
