Sud lang sa duha ka adlaw nga kampanya batok kriminalidad, moabot sa dul-an P10 milyones nga balor sa illegal nga drugas ang nasakmit sa Police Regional Office (PRO) 7.
Sa susamang operasyon, adunay 200 ka mga armas nga way lisensiya ang nasakmit sab sa PRO 7. Ang maong kampanya may kalabutan sa nagkaduol nga Barangay ug Sanguniang Kabataan Elections (BSKE) 2023.
Ang mga illegal nga armas nakuha pinaagi sa door to door nga pagduaw ngadto sa mga gun owner nga expired na ang mga lisensiya.
Samtang ang ubang armas boluntaryo nga gi-surrender sa mga nanag-iya niini ngadto sa mga police station samtang nagpadayon pa sa paghikay sa ilang mga dokumento o permit.
Sa kampanya batok illegal nga drugas, ang PRO 7 nakasakmit og 1,352.68 ka gramos sa gituohang shabu nga dunay standard drug price nga P9,198,224 ingon man ang pagkasikop sa 147 ka drug personalities.
Sa illegal gambling operations, nakaimbargo sila og P20,917 nga sugal gikan sa 220 individuals nga mga sugarol.
Moabot usab sa 19 ka most wanted person ang nadakpan ug 163 ka laing wanted person ang naposasan atol sa pag-serve sa mga warrant of arrest nga nag- atubang og lain-laing kaso sa korte.
Niadtong Septiyembre 21-22, 2023, ang PRO 7 milusad sab og dungan nga operasyon nga miresulta sa pagkasikop sa 554 ka mga suspetsado.
Subay niini, gidayeg ni Police Brigadier General Anthony Aberin, hepe sa kapulisan sa Central Visayas, ang iyang mga sakop sa laing malampuson nga pagpuhag sa kriminalidad pinaagi sa ‘Five Focused Agenda’ sa PNP ug sa BIDA Program ni DILG Secretary Benhur Abalos Jr.
“The seizure of these large amount of illegal drugs is calculated to result in a more peaceful and secured Central Visayas aligned with the objective of the BIDA Project of SILG Atty. Benjamin “Benhur” Abalos Jr., and the 5 Focused Agenda of the PNP,” matod ni Aberin.
Ning nagkaduol na ang election sa barangay, nimando si Aberin nga hingusgan pa ang ilang anti-criminality operations aron makab-ot ang malinawon ug luwas nga piniliay.