GIBUTYAG sa Bureau of Fire Protection - Davao (BFP-Davao), Dominggo sa buntag, Septyembre 24, 2023, nga ang 10-oras nga sunog nga nidanyos og P13-milyon nga kantidad sa mga gamit sa konstraksiyon tungod sa karaan nang mga materyal sa elektrisidad ug di maayong bentilasyon.
Si Senior Officer Ramil Gallido, Davao City Fire District (DCFD) Intelligence and Investigation Section chief nagsulti sa SunStar Davao nga ang gilantaw na nila ang duha ka posibleng anggulo sa sunog nga nilamoy sa warehouse sa Sobrecarey Street, Barrio Obrero, Barangay 14-B niadtong Septyembre 22.
“Duha ka buok nga angle ang atoang ginalantaw karon. Una is ang electric cables nila. Karon gina-follow up nato na considering nga since 1989 pa ang ang establishment natukod ug posible nga daan ang wirings. Kung walay rewiring nga nahitabo, posible gyud nga sa kuryente na gikan [ang sunog]," pagtataw niya.
Dugang pa sa opisyal nga laing posibilidad sa hinungdan sa sunog mao ang kalidad sa bentilasyon kon diin gitumbok ang mga pintura sulod sa gambalay, niinit.
“Naay mga pintura ug construction chemicals nga posible maoy hinungdan sa sunog. Ang pintura man gud naay [flammable] chemical which is kung muinit, maka trigger og explosion,” dugang pa sa opisyal.
Hinuon, sulti niya nga walay napagan nga mga balay tungod kay dunay firewall ang gambalay. (DEF)