SA PANEGURO nga dili masudlan og mga kawatan ang mga nag-unang establisemento sa poblacion area sa Davao City, ang San Pedro Police Station mihimo og inspection sa mga drainage system.
Sa pagpanguna ni Police Major Marvin Hugos, station commander sa San Pedro police, ilang gisubay ang mga nag-unang drainage sa San Pedro Street, buntag niadtong Septyembre 22, 2023.
Sumala ni Major Hugos nga usa kini ka precautionary measures aron malikayan ang pagransak sa mga money remittance office, mga pawnshops ug bisan ang mga bangko.
Kini human nga nakita sa kapulisan nga usa ang drainage o kanal ang posible nga agian sa mga manglungkabay para makasulod sa establisemento.
Sa maong precautionary measures activity, kauban sa San Pedro PNP ang Urban Search and Rescue (Usar) team sa Central 911 aron kahatagan og dugang pagpasabot ang mga nagdumala sa mga establisemento.
Hinuon, mikooperar ang mga business managers sa gihimong aktibidad.
Kahinumdoman nga usa ka mga natigayong lungkab sa area of responsibility (AOR) sa Talomo Police Station, dunay dakong posibilidad nga miagi sa drainage ang mga kawatan, una nila nasulod ang establisemento.
Sa nakalabay sab nga mga katuigan sa usa ka sikat nga grocery store sa Toril, Davao City, mga kawatan miagi usab sa drainage aron nga masulod ang tindahan.
