Mga duwa karon, Septiyembre 26, 2023:
5:15 pm- UV batok UCLM (High School)
6:45 pm- Roosevelt batok USPF (College)
Labnihon og suway sa Cebu Roosevelt Memorial Colleges (CRMC) Mustangs ang sayong liderato sa college division sa ilang pagpakigbatok sa University of Southern Philippines (USPF) Panthers sa main game ning Martes, Septiyembre 26, 2023, sa Cebu Schools Athletic Foundation Inc. (CESAFI) basketball event sa Cebu Coliseum.
Ang Mustangs, nga usa sa duha ka bag-ong mga miyembro sa CESAFI, nasubhan og kadaugan batok sa laing bag-ong miyembro sa liga nga mao ang Felipe R. Verallo Foundation College (FRVC) Blue Dragons, 66-63, atol sa unang adlaw sa kompetisyon niadtong Sabado, Septiyembre 23, 2023.
Ang kadaugan seguradong nakahatag og dugang kadasig hilabi na kay ikaharong nila ang Panthers nga usa sa labing karaang miyembro sa liga.
Sa laing bahin, angkunon sab og suway sa University of Cebu Lapu-Lapu (UCLM) ang sayong liderato sa high school division sa ilang pagpakigsangka sa University of the Visayas (UV) Baby Green Lancers sa premirong duwa.
Ang UCLM nabunyagan og dakong kadaugan batok sa University of San Carlos (USC) Baby Warriors, 82-58, sa Dominggo, Septiyembre 24, 2023.
Apan batok sa Baby Green Lancers, gilauma’ng makasugat og malisod nga pagsuway ang UCLM.
Sa laing mga duwa sa high school division niadtong Dominggo, gipangmakmak sa University of san Jose Recoletos (USJ-R) Baby Jaguars ang City of Bogo Science and Arts (CBSAA) Trailblazers, 68-52.
Samtang sa college division, gipangbuntog sa Benedicto College Cheetahs ang University of the Philippines (UP)-Cebu Maroons, 65-58, samtang gipatapsingan sa USJ-R Jaguars ang USC Warriors, 60-58. (ESL)