Motor nga hinatag ‘gigamit sa pagtulis’

NAILHAN SA MOTOR: Dali nga nasubay ang mga suspek sa pagpanulis sa dihang na-ilhan kini pinaagi sa motorsiklo nga ilang gigamit. / Naga City Police Station
NAILHAN SA MOTOR: Dali nga nasubay ang mga suspek sa pagpanulis sa dihang na-ilhan kini pinaagi sa motorsiklo nga ilang gigamit. / Naga City Police Station

Manag-agaw nga suspetsadong mga tulisan nadakpan kay motorsiklo nga hinatag sa uyoan nasubay sa kapulisan nga maoy gigamit sa pagpanulis.

Mga suspek nga sila si Henry Caparida, hingkod, ug Christopher Caparida Dieparine, pulos taga Sityo Antipolo, Brgy. Linao, Dakbayan sa Talisay, napusasan atol sa hot pursuit operation alas 7:30 sa buntag sa Martes, Septiyembre 26, 2023 sa ilang tagsa ka balay.

Si Police Staff Sgt. Jake Catane, imbestigador sa Naga City Police Station nga nahinabi sa Superbalita Cebu sa Martes, Septiyembre 26, pinaagi sa telepuno, nagkanayon nga ang manag-agaw positibong giila sa duha ka collectors sa lending ug sa salesman sa softdrinks nga mga biktima.

Ang duha nasubay pinaagi sa motorsiklo nga red/black Honda XRM motorcycle ( 8122 GK) nga hinatag sa uyoan.

Matod ni Catane, nga unang gitulis sa manag-agaw ang duha ka collectors sa lending niadtong Septiyembre 20, 2023 sa hapon sa Brgy. Langtad, Dakbayan sa Naga.

Ang mga lending collector nga sila si Jofie Malaran, ug Jesson Pepito, positibo nga niila sa red/black Honda XRM nga nagdala sa plate number 8122 GK.

Gisubay nila ni Catane ang maong motorsiklo sa buhatan sa Land Transportation Office (LTO 7).

Sukad niadtong 2009, nabalhinbalhin ang pagpanag-iya sa motorsiklo.

Ilang nasubay nga ang motorsiklo gihatag ngadto kang Henry dayon gibayran kini og P15,000 ni Christopher.

Samtang niadtong Martes sa buntag, Septiyembre 26, 2023, usa ka biktima sa pagpanulis ni-report sa kapulisan.

Ang biktima giila nga si Albert Dais, 31, minyo, taga Bakilid, Brgy. Tananas, Lungsod sa San Fernando, salesman sa soft drink company.

Sumala pa sa biktima nga nag-angkasay ang mga suspek sa Honda XRM sa alas 6:30 sa buntag niadtong Septiyembre 25, 2023 sa Barangay Lutac.

Ang biktima nag-deliver og softdrinks sa mga sari-sari store.

Ang usa sa mga suspek niduol, dayon nition sa armas dungan sa pagdeklarar og tulis.

Sa kahadlok nga mapusilan, gitunol sa biktima ang P20,000 nga halin, uban sa pitaka ug mga identification (ID) card.

Si Catane nagtuo nga aduna pay laing mga nabiktima ang mga suspek ngadto sa ubang lugar.

Si Henry nga nahinabi sa Superbalita Cebu hugtanong nanghimak sa pasangil.

Sumala pa niya nga wala siya masayod nga nanulis ang iyang ig-agaw nga si Christopher.

Nakugang na lang siya sa dihang gidakop sa mga polis niadtong Martes sa buntag samtang naghatud sa mga bata sa eskwelahan sa Brgy. Lawaan, Talisay.

Matod niya nga ang motorsiklo gipalit ni Christopher kaniya tulo ka mga semana na ang milabay sa kantidad nga P15,000.

Gani, niadto lang Dominggo, Septiyembre 24 naimpas ni Christopher ang kuwang nga P1,500 nga gidata-datahan niini sa pagbayad.

Gipadayag ni Caparida nga limpiyo ang iyang konsensiya ug wa siya malambigit sa pagpanulis.

Nitumaw nga ang kauban sa iyang ig-agaw mao ang ila ra sab nga silingan nga usa ka ‘Jarem’.

Dugang pa ni Henry andam siya moatubang sa imbestigasyon aron paglimpyo sa iyang ngalan. / GPL

Trending

No stories found.

Just in

No stories found.

Branded Content

No stories found.
logo
SunStar Publishing Inc.
www.sunstar.com.ph