Gipasakaan og kasong pagpanglugos ang usa ka 21 anyos nga pintor human gitudlo nga maoy nilugos sa usa ka 18 anyos nga dalaga niadtong Lunes sa kaadlawon, Septiyembre 25, 2023 human sa kalingawan sa Siomai Festival sa Barangay Tisa, Dakbayan sa Sugbo.
Ang suspek giila nga si Charles Sixto, pintor sa usa ka construction company, taga sitio Upper Sta. Ana, Brgy. Labangon, dakbayan sa Sugbo.
Unang nidangop sa buhatan sa Labangon Police Station ang biktima uban sa iyang inahan aron ireklamo ang ilang silingan nga giingon nga niamong-among kaniya sa dihang padu’ng na siya mopauli.
TSIKININI
Asoy sa biktima nga si Shantel, 18, (tinuod ngalan gipugngan), padung na siya mopauli sa ilang balay gikan sa kalingawan sa Siomai Festival sa Tisa pasado alas 4 sa kaadlawon.
Iyang nalabyan ang suspek nga naa sa kilid sa dalan nga paingon sa ilang balay nga daw nagsuka-suka na sa kahubog.
Apan nakabantay na siya nga nisunod kaniya ang suspek ug pag-abot sa lugsungon nga bahin sa dalan, kalit lang siya nga giambakan nga miresulta nga sila nangatumba sa kasagbutan.
Nagtuo ang biktima nga tulison siya hinungdan nga iya ning giingnan nga kuhaon ang iyang wallet ug cellular phone, dili lang siya hilabtan.
Apan gigunitan siya sa suspek ug gibitad paingon sa punoan sa saging ug didto gihuboan siya sa iyang sapot dayon nihilabot sa iyang pagka babaye.
Wala pa matagbaw ang suspek, gibuhatan pa siya og kiss mark kun tsikinini sa walang bahin sa liog ug gipugos siya sa pagpa um-um sa kinatawo niini.
Iyang gibutyag nga daghan unta sila nga manguli uban sa iyang mga ig-agaw apan giuna niya og hatod ang iyang classmate apan sa iyang pagbalik wala na diha ang iyang mga kabanay.
Human mahimo ang krimen, nidagan siya pauli sa ilang balay ug nitug-an sa iyang maguwang sa nahitabo kaniya nga nadunggan usab sa iyang amahan.
Dali nga gisubay ang kuha sa CCTV sa dapit ug positibo nga giila si Sixto sa mga kabanay sa biktima.
Dali nga mihimo og follow up operation ang Labangon police sa pagpangulo ni Police Major Angelito Valleser ug ilang nadakpan ang suspek.
MIHIMAKAK
Sa interview kang Charles sa sibyaanang dyHP, siya niangkon nga iyang nahilabtan ang biktima nga iyang gihulagway nga hubog na.
Matod niya nga wala niya lugosa ang biktima. Gani nag sikitsikit na kini kaniya samtang nanglakaw na sila pauli.
“Nagsikit-sikit naman na sa akoa mao to gikuyog nako sa kilid. Nikuyog man sad siya. Wala man sad siya niangal, Sir, mao to nagtuo ko nga okay ra siya. Sa wala pa na nahitabo, niingon siya nga gidugo kuno siya maong hinaya lang,” matod ni Charles.
Nangayo og pasaylo ang suspek sa biktima dungan sa pagbasol nga iyang nahimo apan bisan pa niini gikiha gyud siya og rape sa Labangon Police Station.
