Human trafficking victims ayudahan

Human trafficking victims ayudahan

Moapod-apod si Cebu Governor Gwendolyn Garcia og tag P10,000 nga ayuda ngadto sa 16 ka mga Sugboanong mananagat nga apil sa naluwas sa mga awtoridad sa human trafficking sa Tubalubac Island, Pangutaran, Sulu.

Si Garcia nisaad kang Bitag host Ben Tulfo sa pagtunol sa ayuda atol sa pagbisita niini sa Kapitolyo sa Septiyembre 25, 2023, taho sa Sugbo News, social media news platform sa buhatan sa gobernador.

Ang mga Sugboanon nalakip sa 123 ka mga biktima sa human trafficking sa naasoy nga lugar nga na-rescue sa mga sakop sa Naval Forces Western Mindanao (NFWM), Ministry of Labor and Employment in Bangsamoro Autonomous Region in Muslim Mindanao (BARMM), Women and Children Protection Center-Mindanao Field Unit (WCPC-MFU), ug Philippine National Police – Special Action Force (PNP-SAF) niadtong Septiyembre 19.

Subay niini, gipahibawo sa Kapitolyo nga gimandoan na sa gobernador ang Provincial Social Welfare and Development Office nga hatagan og dugang assistance ang mga biktima nga makabalik na sa Sugbo.

Gawas sa mga Sugboanon, duna say mga Bol-anon.

Sila gipasaligan og maayong trabaho paingon sa Malaysia o Indonesia pinaagi sa southern backdoor sa Pilipinas.

Apan ang gilauman unta nga maayong trabaho sa pagpanglangyaw niresulta na hinuon sa pagkapriso sa mga kamot sa mga armadong tawo nga nipugos kanila sa pagtrabaho o pagpangisda ug pagpagamit sa ilegal nga drugas aron makalahutay sa katugnaw sa tubig sa dagat.

Nanghinaot ang kagamhanan nga pinaagi sa maong ayuda, mahatagan og panginabuhi ug maghinayhinay sa pagbalik sa ilang naandan nga kinabuhi ang mga biktima. 

Trending

No stories found.

Just in

No stories found.
logo
SunStar Publishing Inc.
www.sunstar.com.ph