Human sa dul-an tulo ka semana human niigo ang duha ka mga sunog sa usa lang ka adlaw, laing sunog na sab ang niigo sa Brgy. Tejero, dakbayan sa Sugbo, sa Huwebes, Septiyembre 28, 2023.
Ang labing ulahing sunog niulbo sa Sityo Tevil sa ala 1:39 sa hapon ug pagka ala 1:42, gisaka ngadto sa second alarm.
Sumala sa kabomberohan, ang kayo nakontrolar sa pagka-alas 2:05 sa hapon ug gideklarar nga hingpit nga napalong sa pagka-alas 2:09 sa hapon.
Walay gikatahong namatay o samdan apan 18 ka mga balay ang nasunog, lima ang partially-burned.
Dili mominos 35 ka mga pamilya o gibana-bana nga 150 ka mga indibiduwal ang nawad-an og kapuy-an sa maong trahedya. Gibana-bana nga P1.8 milyunes ang danyos.
Atol ning pagsuwat, ang imbestigasyon sa Bureau of Fire Protection (BFP) nagpadayon pa.
Sa pagkakaron, gikustodiya sa kapulisan ang usa ka babaye nga adunay deperensiya sa pangisip tungod kay nagduda sila nga posibleng maoy hinungdan sa sunog. / KJF