Rabacal: Ang trapik sa Cebu City

Rabacal: Ang trapik sa Cebu City

Gitudlo og balik ni Mayor Mike Rama si Konsehal Rey Gealon isip traffic czar sa Cebu City. Ikaduha na kining pagpangulo ni Gealon sa maong ahensiya kay gitudlo na kini siya sa maong pwesto sa unang termino ni Mayor Rama niadtong 2015.

Dako kini’ng problema sa trapiko sa siyudad nga angay solusyonan ni Gealon, apil na niini kini’ng wala magkadima-o nga traffic light system nga balor og P480 million nga sumala pa “The best in the world.” Wa pa man hinuon ma-turnover kining maong proyekto ngadto sa Siyudad kay wa pa makompleto sa contractor ang pag-digitalize sa tanang traffic lights nga giistalar sa kadalanan sa siyudad.

Maayo tingaling estudyohan pag-ayo ni Gealon kon asa gayud maayo nga idestino ang iyang mga traffic enforcer kay sa pagka-karon ato mang makita ang mga eskina nga magpa-ugatay ang drayber sa mga sakyanan. Usa ka ehemplo niini mao ang busy kaayo nga F. Cabahug, eskina Almendras Streets, nga wala gayuy enforcer bisan sa mga rush hours. Adto man hinuon kini sila magbantay sa dapit sa traffic light nga dili problemado. Daghan kining mga eskina nga ingon niini. Naa usay ubang enforcer nga manago. Ambot unsa man diay ang tumong ug tuyo sa atong transportation office, nga daghan sila’g madakpan nga makalapas sa balaud sa trapiko o ang pagpugong sa mga motorista nga makahimo og salaod? Usik usab kaayo ang panahon niining mga enforcer nga magpundok aron mosita sa mga drayber kon duna ba silay Citom ID.

Hinaot pa nga sa paglingkud pag-usab ni Gealon isip traffic czar, mamaayo na kining dagan sa trapiko sa siyudad.

* * *

Nakadawat kog hulagway sa pipila ka mga inilang politiko nga sumala pa nakuha atol sa pagsaulog ni kanhi city administrator Floro Casas sa kasumaran sa iyang adlaw’ng natawhan. Sa maong litrato, makita sila si Casas sa tunga nga gilibutan nila ni Vice Mayor Raymond Alvin Garcia, kanhi mayor Alvin Garcia, Metro Cebu Water District (MCWD) Chairman Joey Daluz, Konsehal Rey Gealon ug uban pa nilang mga dumadapig.

Ang maong hulagway gibutangan og caption nga, “In unity, there is strength.” Mao kini ang akong gihinuktokan kon unsay gipasabut niini. Ang uban moingon nga preparasyon na kini sa piniliay karong 2025. Ang usa nga apil sa maong hulagway miingon kanako nga “magkaaway na gyud sila sa umaabut eleksiyon.” Si kinsa man ang ilang kaaway kon kaatbang? Nakahatag kini’g pagduda sa mga nakakita ning maong hulagway. (mannyrabacal1144@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph