Namatay ang usa ka 63 anyos nga ginang nga angkas sa usa ka motorsiklo samtang nagpayong human siya napalid ug nahulog alas 7 sa buntag sa Miyerkules, Septiyembre 27, 2023, sa barangay road sa Sitio Hophopan, Barangay Buenavista, lungsod sa Tudela, mga isla sa Camotes.
Ang biktima giila nga si Norma Estremos, lumolupyo sa dapit.
Sa pagkighinabi sa Superbalita Cebu kang Police Chief Master Sgt. Salvador Vaidal, traffic police investigator sa Tudela Police Station, nasayran nga si Estremos naglakaw sa karsada nga nagpayong.
Siya naagian sa ilang silingan nga si Romel Peteros, 44, minyo, nga nagmotorsiklo nga gikan naghatod sa iyang anak sa eskwelahan.
Gihunongan ni Peteros si Estremos ug gipaangkas sa iyang motorsiklo.
Apan sa pag-agi nila sa dulhugon nga dalan, nihapak ang kusog nga hangin ug nadala ang biktima sa pagkapalid sa payong.
Napantok ang ulo niini sa dalan hinungdan nga nakaangkon og dakong samad.
Ang biktima gidala sa Camotes Island Provincial Hospital apan alas 3 sa hapon sa samang adlaw, nakabsan kini sa kinabuhi.
Ang pamilya sa biktima nakigsabot kang Peteros hinungdan nga dili na mag-atubang og kasong reckless imprudence resulting to homicide. (DVG)
