Dear Noy Kulas
Magpatambag unta ko sa akong problema parte sa akong anak nga lalaki.
Hilig kaayo ko og sports, kanang basketball ug boxing mao nangandoy ko og anak nga lalaki.
Mao to lipay kaayo ko kay nakaanak ko og lalaki. Pero na frustrated ko kay nagkadugay ang mga tuig, nilutaw nga bayot ang akong anak kay bisan unsaon nako og paapil og sports nga lalaki, like martial arts, mobawog jud ang mga kamot ug labyog maglakaw.
Karon nga duol na ma teenager nagkagrabe na siya.
Usahay mag-away mi sa akong asawa kay labanan man niya.
Pakpak kaayo siya sa among anak kay okay ra kuno og bayot.
Okay ra baya unta ko but ang ako unta nga naa koy anak nga maayo moduwa og basketball ug hilig og martial arts.
But ang akong asawa ug akong pamilya support kaayo sa akoang anak. But ako di proud sa akong anak.
Ikaw, Noy, unsa may imong tan-aw sa akong sitwasyon ug stand ani nga issue? Daghang salamat.
PILO
Pilo,
Matag usa nato dunay iyang panglantaw ug panan-aw.
Masabtan ang imong gibati parte sa imong anak kay nasukwahi sa imong expectation parte niya.
But sabta usab ang nature sa imong anak kay di usab na niya sala kon ingon niana siya, usa ka bayot. Nothing is wrong with being gay.
Mao sab nang di sala ang pagkalakin-on. Ang sayop mao ang pagbuhat og di sakto o krimen, sama sa pangabuso.
Daghan nang mga bayot nga open nga maoy nagdala og kaharuhay sa ilang tagsa ka pamilya.
Sila ang nag-agak ug nagsuporta sa pamilya aron makahaw-as gikan sa kalisod.
Busa, di ka angay mahimangod o maguol nga bayot ang imong anak.
Respect ug ipakita ang imong love niya bisan kon wa siya mohaum sa imong damgo alang sa imong mamahimong anak.
NOY KULAS
rojval69@yahoo.com
