WALA pa nagpagawas og pamahayag ang kompanya sa bus nga maoy nakaligis sa Grade 4 pupil sa Sta. Ana Central Elementary School sa Davao City pasado alas 4 sa hapon, Huwebes, Septyembre 28, 2023, sa Trading Boulevard, Davao City.
Samtang sa Facebook post sa Department of Education (DepEd) Davao Region, si Davao City Division School Superintendent Reynante Solitario mipaabot og pahasubo ngadto sa pamilya sa 9-anyos.
“DepEd Davao City mourns the untimely demise of the learner of Sta. Ana Central Elementary School who got hit by the bus yesterday, September 28, 2023 while crossing the pedestrian lane on her way home. Our deepest sympathy to the bereaved family. We pray for the eternal repose of her soul,” sa post ni Solitario.
Luyo sa nahitabo sa biktima nga usa ka 9-anyos, gihingusgan sa mga kabanay nga mopasaka gayod sila og kaso batok sa drayber sa bus.
Si Rizalde Cortes, apohan sa 9-anyos nga biktima, misaysay sa dxGM Super Radyo Davao nga andam sila mopasaka og kaso batok sa drayber nga giilang si Efren Cerona Jr.
Atol sa aksidente, dead on arrival ang biktima sa ospital. Ang drayber sa bus gikustodiya na sa kapulisan sa San Pedro Police Station.
Sa mga nagkatag nga kuha sa CCTV makita nga mitabok ang bata sa pedestrian lane apan ang bus padayong nidagan ug daw wala makita sa drayber ang bata nga mitabok.
Nabatbat sab sa apohan nga mangayo sila’g pagpatin-aw sa bahin sa tunghaan sanglit natingala sila nganong sayo nakauli ang bata niadtong adlawa.
Saysay sa apohan nga ginasundo ang biktima matag alas 4 sa hapon base sa nasabutan sa mga tagdumala sa eskuwelahan ug mga ginikanan sa bata apan gikakurat sa pamilya nga sayo nga nakagawas ang biktima ug miabot na sa Trading Boulevard pasado alas 3 pa lang sa hapon hinungdan nga buot sa pamilya nga pa-imbestigahan ang eskuwelahan.
Gibarugan sab sa bus drayber nga blind spot na sa sakyanan hinungdan nga wala na niya nabantayan ang pagtabok sa bata.
Nangayo sab siya og pasaylo sa pamilya sa biktima.
Gipaningkamotan sa SuperBalita Davao nga makuha ng bahin sa kompaniya ug ang pagtubag sa Sta. Ana Central Elementary School labot sa pahayag sa apohan sa biktima.
Samtang mikatag karon ang hulagway sa biktima sa buhi pa kini nga nangdawat sa iyang mga awards sa eskuwelahan, diin sa hulagway makita nga gidawat sa biktima ang iyang mga ribbons ug certificate atol sa ilang recognition day ning tuiga sa iyang paghuman sa Grade 3 diin naa siya’y award isip Math Wizard, Most Respectful, Most Helpful ug Most Responsible. (Uban sa taho ni Jhesa Torrefranca sa GMA Super Radyo Davao)
