GIDASON sa Land Transportation Franchising and Regulatory Board-Davao Region (LTFRB-Davao Region), Huwebes sa hapon, Septyembre 28, 2023, nga usa sa mga solusyon nga ilang gilantaw nga makapaluag sa paghuot sa mga sakyanan sa dakbayan mao ang padayon ug hapsay nga implementasyon sa Peak Hours Augmentation Bus System (PHABS) nga gipatuman na sa milabay nga duha ka tuig.
Sa pinakalit nga paghinabi sa ikalima nga Regional Dagyaw Open Government Town Hall Meetings, uban ang tema “Transportasyon sa Davao Region, Unsa Na?” sa Ritz Hotel, Obrero, Davao City, gipahayag ni LFTRB Davao Regional Director Nonito Llanos III ngadto sa mga tigbalita ang kaimportante sa PHABS ilabi na sa pagtubag sa suliran sa trapiko sa panahon sa "peak hours" nga nakaapekto di lang mga estudyante apan apil na mga trabahante gikan sa gobyerno ug pribadong sektor.
“Hopefully within the next 3-4 years, especially kaning Davao Bus System. Nindot kaayo na implementation sa atoang city. We are looking forward that the implementation would be probably final.
“Naa natay gitawag nga PHABS. Padayon nato na gina-assess together with CTTMO kung asa pa ang mga areas na providan nato og mga bus and sa pagkakaron daghan na ta mga areas nga nagdugang tag bus fleets,” pagtin-aw ni Llanos.
Dugang sa opisyal nga nakigkoordinar na sila karon sa local government unit (LGU), mga ahensiya sa gobyerno ilabi na sa sektor sa industriya, ug kompaniya sa bus alang sa hingpit nga operasyon sa PHABS.
Kahinumdoman nga ang PHABS nagsugod sa operasyon niadtong 2019 gikan 6:30 sa buntag hangtud 9 sa buntag ug 5:00 sa gabii hangtud 9:00 sa gabii, mga bus magsugod og biyahe sa ilang gidesignar nga mga rota nga giila isip peak hours.
Sa pagkakaron, dunay upat ka mga bus nga naglugway sa ilang pagkomitar ngadto sa city’s transportation project: Golden Valley, Metro Shuttle Bus, Bachelor Express ug Land Car Incorporated (LCI).
Ang ikalima nga sirkulo sa Regional Dagway nagtumong sa paghisgut sa mga kabalaka ug isyu sa transportasyon ug sistema sa transport system infrastructure, implementasyon sa Public Utility Vehicle Modernization Program (PUVMP) phase out, livelihood programs nga gihanyag ngadto sa mga drayber sa PUVs, ug ang kasamtangang kahimtang sa PHABS.
Mga panelista gikan sa nagkadaiyang grupo sa transportasyon ghatagan og taas nga oras sa Open Talks aron sa pagtubag sa mga pangutana nga gipadayag sa mitambong nga gilangkuban sa mga tigbalita, estudyante, ug mga giimbitahan nga mga organisasyon sa publiko ug pribado. (DEF)
